Shillong: Ki khloo adong ki khloo kyntang, ki khloo chnong, khloo raij, khloo syiem, toh i stat yong ki paaid Ynñiawtrep wow pynneh pynsah wow yada ya ka rymaw kawa ka pyrthai dang ha kini ki sngi khyrngiat ki wow pynneh pynsah ya ka.
U Prof. BK Tiwari na NEHU, da ong u wa waroh ki dawai kynbat da yoh na ki khloo wei lada wiar ki daw wiar lut ki dawai leh.
Da ong u wa ha ri-loom Khasi Jaiñtia, ym toh wa em du ka Khloo Kyntang wa em ha Mawphlang tangwa da em ki da ki spah tylli ki khloo kyntang kiwa da pynneh pynsah da uwa rim wa jah.
U Prof Tiwari da ong u yeini ha ka yachem wa kiwa sumaar bru (Traditional Healer) ka jylla kawa pynman da ka Tambourine Trust ynne ka sngi ha NEHU Guest House, Shillong.
Kamwa 50 ngut kiwa e dawai kynbat na ki thaiñ Sohra, Mawphlang, Lyniong wa na kiwi ki thaw da wan chimbynta ki ha kani ka yalang yow ya phyllu yumut wow pynjanai ya i rukom sumaar bru.
Boon na ki rukom sumaar toh kiwa hiar pateiñ dei batai da ki ktien wei lada ym yasaam cha kiwi ki pateiñ, daw wiar jait i stat.
I por ymtoh de wow pam khiar ya ki khloo, i por toh wow syndong ya ki khloo ki kjam neibhah ki dawai wow pynbha ya ki kjut wa lak phaw jait rieh ki ha kini ki khloo.
U Tambor Lyngdoh da ong wa i thmu kani ka yalang toh wow ya e yumut para wa sumar bru yow man ko kawa tipmit ka pyrthai yei stat kiwa rim wa jah wei emkaam u yakrehlang yow lai cha khmat yow ye u sumaar ya ki kjut wa kiwi ym ye ki u sumaar.
Discussion about this post