Jowai : Katwon man iwa sahkynmoo ya ki sister, ki wa sikai, ki khynnah puræ ka skur St.Marry Mazzarello Jowai wa hadien i dap 90 snem i e chakri ka skur hei stat i tip, da wan hiar li pait kyrpang ka heh dooh yong ki sister haka pyrthai kawa tip kam ka Mother Yvonne Reungoat Superior General Of The Salesian Sisters kawa da wan pait ya kani ka skur wei kamjooh leh kawa pait ya ki 93 tylli ki Ri haka pyrthai.
Kani ka sister toh kawa na ka ri France da kha ya ka haka 14 tarik u Duyatra (January) 1945 wei kreh won ko hapoh Rome.
Ha kani ka sngi nadooh ki khynnah skur ki wa sikai ki sister, hei emlang u Bishop Victor, wa kiwi da pdiang burom ki yaka Mother Yvonne Reungoat haka yalang wa da pynman ha pchem ka skur Mazzarello.
Ha kani ka yalang da wan emlang leh u SP ka West Jaiñtia u R. Muthu.
Da yoh yei ktien pdiang burom naka sister Superior R. Susngi, da yoh i rwai pdiang burom yaka Mother Yvonne Reungoat na ki khynnah skur ki wa sikai da i sur wa pyrtuid Benvenuta heiwa da rwai ki hei ktien Italy, da yoh leh yei rwai chaphang ka Mother Mazzarello kamjooh da yoh leh i Chaad Sukra na ki khynnah.
Ka mother Yvonne Reungoat ha kani ka sngi da pyllait paidbah ko yaka CD wada rwai daki khynnah puræ kani hi ka skur chaphang ka Mother Mazzarello kamjooh i rwai kyrpang hei yatoh i wan poi li pait ko yaka skur yong ki iwa man leh chi bynta i dap 90 snem ka skur wei ya kini ki rwai da thoh da u Terence Sawian wa u Paulinus Kharmudai.
Ka Mother Yvonne Reungoat hei klam yong ka da pynsñiaw ko i mynsien wa kmen wow poi ha Jowai hanla man ka sien wa nyngkong wa yookjat ko, dap ko dei kmen wa khroo u yoo deikhmat ya ki khynnah skur kiwa man ka mynried ka imlang sahlang.
Da ong ko leh wa ka mynried chong ko ha kti yong ki khynnah wei waroh ki khynnah skur u leh ki ya ki kaam wow wanrah ya i roi i paar kamjooh i bha i miat ha ka imlang sahlang.
Discussion about this post