Shillong : U Convenor yong ka North East Democratic Alliance (NEDA), uwa man leh u montri ka tnat poisa poilaiñ ka sorkar Assam wei heijooh i por uwa yahkhmat ya ka BJP uwa pait ya ka thaiñ mihsngi, u Himanta Biswa Sarma da ong u wa ka party BJP hapoh i yahkhmat u Amit Shah kam u president da booh thong ko wow kreh chitom wow pynyaar yei synchaar yong ka party ha waroh ka ri khamtam ka ka thaiñ mihsngi.
“Ha ka thaiñ mihsngi da chem yei yaar ka BJP hadien wa da chem yei jop kput ko ha ka jylla Assam wei wow yoh u synchaar ha Manipur dei yakrehlang wa ka NPP wa ka NPF, ha Sikkim wa ha Nagaland embynta i ha ka liang synchaar hanlada ym em Montri Rangbah, katni synchaar i ha ki san tylli ki jylla ha ki thaiñ mihsngi wei daw kreh i leh neibynta ka election ha u snem 2018”, da ong u Himanta.
Chooh chooh da ong, “I thmu yong ka sorkar India neibynta wow kyntu ya ka Meghalaya wei wow pyndooh noh yei suki we i wym chimkhia ka sorkar jylla ha ki kam wa boon, kamtæ kamwa da angnood u Montri Rangbah dooh ka Ri u Narendra Modi wow kyntu ya ka jylla emkaam wow synchaar pura i hapoh kani ka jylla”.
U Himanta hei emlang u wa ektien ka BJP wa peit ya ka Meghalaya u Nilin Kohli, u Shibun Lyngdoh u President BJP Meghalaya, da ong ki wa ka sorkar Congress kawa yah da u Dr. Mukul Sangma, toh kawa sih na kiwa sih tam ha ka thaiñ mihsngi wei da kylli ki leh yei rukom man kitæ ki Medical College ka sorkar, ki skurbah ka sorkar Meghalaya hapoh i synchaar u Dr. Mukul Sangma ha kini ki chiphaw snem.
Ha Meghalaya em du 2 tylli ki college sorkar katwa ka Assam em 10 tylli ki medical college, “Ka Meghalaya em ko du ar tylli ki College sorkar ha waroh kawi ka jylla wei kitæ ki Medical College wa da kular da u Mukul dang sahteiñ ki”.
Da ong u wa ka BJP wa daw khana ko ya ki kaam wa leh ka sorkar u Dr. Mukul cha ki paidbah wow kyntait noh ki ya ki kam yong ka wei wow jied ya ka BJP ha ka Election 2018 ha kani ka jylla.
Hei yatoh wa chah pynbad ka BJP wa pyrchah Khristan ko, u Himanta da ong u wa ini waroh toh i sñiawthooh bakla neibhah wa ka sorkar pyrdi ym em khut wow pynman ya ka Good Governance Day ha ka 25 Kmaichonglad (December) wei kani toh wa da leh waroh chi tayaw wei da tip ya ka leh kam ka Good Governance Week, kawa pynkut ha ka 2 tarik u January u 2017 wei ye u jied ya kawon ka sngi ha kani ka tayaw.
Da ong u leh wa ka BJP ka yieñ ko neibynta kiwa khian paaid yong ka Northeast wei burom ko leh yei man kyrpang yong ki.
Yeiwa pyrchah Khristan ka BJP da ong u wa kiwa em ha Nagaland, ha Manipur wa ha Assam da em leh ki MLA ka BJP kiwa man ki Kristan hapoh ka BJP.
Hei yatoh wa ki khubor hamsaya wa ong wa ka BJP daw khang ko wow baam wei wow dai doh masi lada wan ko ha i bor ha Assam, da pynche u deiwa mong wa hadien wa poi ko ha i bor ym em kam itæ.
Ha iwi i liang, u Himanta da ong u wa ka BJP daw yakhun ko ha waroh ki 60 tylli ki constituency ha jylla Meghalaya khlem emkaam wow krehlang wa kiwi kiwi. Da ong u leh wa lada em ha ki thaw wa emkaam u kreh lang wa kiwi ki party, ye ki u yaklam wa ka BJP tangwa i thong toh wow yakhun ka BJP ha waroh ki Constituency.
Da kop u leh wa ka BJP daw chna sorkar ko ha Meghalaya hadien ka election neidaw wa boon toh kiwa da kot yei synchaar ka Congress.
Discussion about this post