Jowai: Ka Rotary Club Jowai ha kani ka 19 tarik kawa man ka sngi kyrpang hei wan pait u Rtn. Sunil Saraf District Governor R.I.D 3240 yaka club yong ki, da chim ki leh yaka bynta u pynkup burom ya kiwa yalehke ka West Jaiñtia District Badminton Association ha Hall ka Loomsooiung Newhill Jowai kiwa da wanrah naam ya ka district kamjooh ka Ri-loom Jaiñtia hi waroh kawi lyngba i rah ki ya 5 tylli ki takma ksiar haka yakop lehke 35th State Level Badminton Championship wa dang dep pynman ha Shillong kitæ toh kynthup ya u Dawanoo Shullai, u Stephan Blah, u Deilangwaoo Nongpluh, Nangebor Suting wa u Mebanker Shullai. Heijooh i por da pyntip ki leh wa u nangebor Suting wa u Mebanker Shullai da man ki kiwa chah jied u mihkhmat won ya ka Jylla haka North East Badminton Championship ka wow man ha Aizwal Mizoram.
Yaka yalang ha kani ka sngi da pyllai da u President Rtn D.F.Majaw wei uwa da e leh ki ktien lamkhmat, hei emlang ki dkhot ka club, ki khynnah skur, kiwa sikai wa kiwi kiwi kiwa chah khut sñiawbha. Neiliang ka club da pdiang burom ko ya u R.Muthu I.P.S. Superintendent of Police West Jaiñtia Hills kam u Honorary Member yong ka Club,
U Rtn. Sunil Saraf District Governor R.I.D 3240 hawa e yei klam ha kani ka sngi da ong u ka Rotary Club toh ka club wa em ha kylleiñ ka pyrthai kawa e i chakri neibynta u paidbah wei kamwa man kattæ hadooh 12 lak 17 hajar ngut ki dkhot, neitæ ong u i em bynta hapoh kani ka club man iwa sñiawsuk bha neibhah e laad ko wow leh yi re yi haka imlang sahlang, ong u hapoh kani ka club du kiwa ye u psiah u man dkhot tangwa iwi wa emkaam tam toh u em haki i yumut wei pyrkhat wei mynsien u chakri neibynta ka imlang sahlang.
Kiwi won wa e i klam kynthup ki ya u Rtn A. Das Assistant Governor RID-3240, u R. Muthu, u President ka West Jaiñtia District Badminton Association u J.M. Pohsngap wa kiwi kiwi.
Da pynchong chit chooh chooh ya kani ka yalang dei rwai pdiang naki khynnah skur ka Jaiñtia Secondary School, i rwai naki khynnah skur St. Paul Mookaswan wei chaad pliang naki khynnah skur RCLP Mihmyntdu.
Discussion about this post