Shillong: Ynne ka sngi u Dr. DD Lapang da kam u wa ym em wow ye u pynrem ya ka Congress ka wow pynyieñ da ki kyrtong wow jop iwa da pyntikna wa ka Congress u poi biang ko heibor ha u snem 2018.
“Hapoh ka Congress ym dooh ko ya ki kyrtong wa ye u jop wei ka Congress ye ko leh u pynyieñ kyrtong ha waroh ki 60 tylli ki Constituency hapoh ka jylla kiwa boon ym ye ki u leh kamni.” da ong u Lapang hawa yaklam u wa kiwa thoh khubor ynne ka sngi.
Da ong u leh wa ym em khuslai u ya ki khubor wa ong wa daw boon kiwa daw yut na ka Congress neibhah ka Congress daw poi biang ko hei bor.
“Hapoh ka jylla em ki seiñ ri-loom wa ki seiñ saiñ pyrthai ka ri tangwa kawa heh dooh hapoh ka jylla toh ka Congress,” da kam u.
Hawa kylli wa da em mo ki MLA wa ka Meghalaya Pradesh Congress Committee (MPCC) da tipmit ko ki wow yut na ka Congress da jubab u wa ym yoh por ka party u pyllut ya kam kitæ ki jait kaam.
“Ya ki Election Form daw saam ha ka tayaw wa khaddooh uni u bnai wei kiwa kwah u yakhun na ka Congress daw wan hi ki cha khmat wei ki wym kwah ym wan ki.”
“Waroh em ki ka hok wow jied ya ka mynried yong ki, kiwa sñiaw wa ka Congress toh ka thaw wa sñiaw biang ki u em u neh hi ki katwa kiwa kwah u jied da kawi ka luti ym em wow khang laad ya ki.” da ong u Lapang.
Chooh chooh da ong u wa lada ka Congress ympoi ko cha ka thong wow chna sorkar deibor samen daw em bait kiwa wan wow kyrchaan ya ka.
Discussion about this post