Shillong: Ka yungbichaar High Court ka Meghalaya ynne ka sngi da e ko ya ka rai heiyatoh waka mukotduma PIL wa da e u Madal Sumer pyrchah ya ka sorkar jylla wa ong waka aiñ wa tip kam ka Meghalaya Parliamentary Secretaries (Appointment, Salaries, Allowances and Miscellaneous Provisions) Act, 2005 toh kawa be-aiñ wei pyrchah ko ya ka riti synchaar ka ri.
Katkam i dawa uwa e mukotduma da ong leh toh u pyndam (Disqualify) noh ya ki MLA wa ksoh kam ki Parliamentary Secretary wa thung da ka sorkar jylla hapoh kani ka aiñ.
Ya kam kani ka jooh ka aiñ wa pynmih da ka sorkar Assam wa tip kam ka Assam Parliamentary Secretaries (Appointment, Salaries, Allowances and Miscellaneous Provisions) Act, 2004 da dep pyndam ya ka da ka Supreme Court ka ri.
Neiliang u muktiar ka sorkar Meghalaya da ong u wa ym ye u pynkrehkaam ya ka hukum ka Supreme Court hei yatoh waka aiñ wa pynmih ka sorkar Meghalaya neibhah ka phær ko na ka aiñ wa pynmih ka sorkar Assam neibhah da pynkylla ya ka ha ka 26.09.2016 yow lait ki MLA wa man kam ki Parliamentary Secretary u yoh tulop boon neiwa ksoh ki ya ini i kyrdan kamtæ neh ki kam ki MLA.
Tangwa hadien wa bichaar ya ini da chem wa ka aiñ ka Meghalaya sariem bha ko waka aiñ ka Assam heiwa da kylla du ki kattu katni donhi ki kyndon.
Hapoh ka jylla Meghalaya katkam ka aiñ toh na ki 60 ngut ki MLA 15% ye ki u man Montri iwa mut 12 ngut wa kynthup lang ya u Montri Rangbah tangwa da em 18 ngut won ki Parliamentary Secretary.
Kamtæ hawa kut ka chong bichaar da pynmih ya ka hukum wow tynyap noh ya ka aiñ ka Meghalaya wei u pynwiar noh ya ka kyrdan Parliamentary Secretaries.
Hei yatoh wow pyndam (Disqualify) noh ya ki MLA wa ksoh kam ki Parliamentary Secretary, ka yungbichaar da e kti ko cha u lat ka jylla u chim u ya ka rai.
Discussion about this post