Jowai: U General Secretary Party ka UDP 4-Mowkaiaw Constituency u O Suchiang wa u RK Laloo Vice President da pynche ki wa i kam u Jermon Sayoo wa man u kam u President yong ka UDP 4-Mowkaiaw Constituency toh iwa bakla.
Neibhah nadooh wa sdang u Heipormi Laloo wow pynbna wa daw yaleh Election u na Mowkaiaw, u Jermon Sayoo da mih pyrthai u wow lai yalap Election cha ki yung ki sem wa cha kiwa boon ki chnong neibynta u Heipormi wei ini da tyngkheiñ u Sayoo ya ka aiñ ka UDP.
Ya ka Ticket UDP na Mowkaiaw da em soo ngut kiwa paan Ticket naka Party wa kynthup ya u Nujorki Sungoh, u Gilbert Sten, u Nehemaya Tyngkan wa u Heipormi Laloo. Ya ka Ticket da e cha u khon u Mihsalan Suchiang u Nujorki Sungoh.
Ha ka yalang ka seiñ wa pynman ha ka 07-10-17 da chim ya ka rai wym tipmit de ya u Jermon Sayoo kam u President ka Party neibhah da yang hadooh wa pynbna yei e Ticket yow pynbna paidbah.
Da pyntip leh wa hadooh kiwa kitkaam yong ka Party leh ym tipmit de ki ya u Jermon Sayoo kam u President yong ka Party. Ya ki yalang ka Party ha kiwon kiwon iwa emkaam da pyllai da u Vice-President yong ka Party u RK Laloo. Ya kiwa kitkaam ka Party da chim ya ka rai wow jied hadien wa dep pynbna kyrtong.
Chooh chooh da ong wa kiwa chong chnong ka Mowkaiaw kiwa kyrchaan UDP da sñiawsih ki yeini i leh u President warim wei ki yieñ skem ki wow kyrchaan ya u Nujorki Sungoh.
Da ong ki leh wa ha ka 25 tarik khut yalang u Heipormi Laloo wei da wan lang leh kiwa kyrchaan UDP, NPP, Congress wa BJP kiwa wan ap wei ki dkhot ka UDP da wan ki neibhah da khut kyrpang ya ki da ka chithi wei da wan ki kam ka dak wow pynyoo ya ka yatylli chi chong chi para wei ym em mut ko wa kyrchaan ki ya u Heipormi.
Also Read: Hadooh 1500 ngut tam ieh ki dkhot ka UDP Mowkaiaw Circle ya ka party
Discussion about this post