Shillong: Ka National Peoples’ Party (NPP) kawa yahkhmat ya ka liang synchaar ha ka sorkar synrop Meghalaya Democratic Alliance (MDA) ha ka jylla da pynsñiaw ko wa ym em iwon iwon i yaphær hapyrdi ki lok kiwa em ha ka sorkar synrop du neidaw ka Election chiteiñ samoi ha Ranikor Constituency.
Hawa klam wa u Symbood Montri Rangbah uwa man leh uwa yahkhmat ya ka NPP, u Prestone Tynsong da kyntait u wa em iwon iwon i yaphær hapyrdi ki paralok ka sorkar synrop MDA wa kynthup ya ka UDP, PDF wa ka HSPDP du neidaw ka Election chiteiñ damoi ha Ranikor, neibhah wa kini ki party kyrchaan ki ya ki yong ki hi ki kyrtong ha kani ka election ka wow man ha ka 23 tarik uni u bnai.
“Ha ka sorkar MDA ym em iwon iwon i leh chiliang wei waroh ki Party wa synrop lang pynlai ki ya ka sorkar,” da ong u Tynsong.
U Montri da ong u wa ka jylla Meghalaya toh ka nongmuna wa biang dooh ha ka synchaar paidbah kawa sakhiat namo ka “True Democracy” neibhah waroh ki lok wa yakrehlang ha ka sorkar man ki kiwa laitlooid wow yakhun ya kawon kawon ka Election.
“Dadep rai hapyrdi ki lok wa em ha ka sorkar MDA wa ki man ki kiwa laitlooid wow yakhun ya ka Election neibynta wym yakhun ki khamtam heiyatoh wa ka Ranikor Constituency,” da pynrap u Prestone.
Heiyatoh wa ka Election ha South Tura, u Prestone da ong u wa ki paralok wa krehlang ha ka sorkar kyrchaan ki ya u kyrtong ka NPP, uwa man leh u Montri Rangbah ka jylla, u Conrad K Sangma.
“Waroh ki lok wa em ha ka sorkar kyrchaan ki ya u kyrtong ka NPP neibhah wa kwah ki wa u Montri Rangbah u yahkhmat u ya kani ka sorkar MDA hadooh wa kut ka samoi krehkaam,” da ong u Prestone.
Heijooh i por da ong u wa ka NPP ym artatien ko wa ki kyrtong ka Party na waroh ar tylli ki Constituency u yoh ki yei naam jop ha kani ka election chiteiñ samoi.
Discussion about this post