Jowai : Ka Jowai Police Traffic Branch ynne ka sngi ha pchem ka ophis yong ki da saam ya ki palat chispah tylli ki ‘Dust Bin’ cha ki dong waper wapher ka chnong Jowai kam chi bynta wow pynchlur ya ki paidbah yow pynman ya ka chnong Jowai kawa khooid wa jngiar.
Ha ka yalang wa pyllai da u ma D. Pde Officer in-charge Traffic Branch da ong wa i khooid wei jngiar man i iwa emkaam kam i baam wa baam i wei ye leh u pynmyllien ya ka nadooh wa dang khian kamwa sikai ya ki khynnah u lai wa u baam ki.
Ka kong R. Mylliemngap President Jaintia Traders Association da ong ko wa ka Iawmusiang toh man ko kam ka dak wa pynyoo yei chait i khiah ka chong Jowai. Da ong ko wa lada ka Iawmusiang khooid ko, ka chnong waroh kawi leh man ko kawa khooid tangwa lada ka Iaw man ko kawa tngit man i iwa dai sarom ya ka chnong.
U ma D. Passah Vice President ka Seinraij Jowai ong u wa boon i tngit ka Iawmusaing toh kiwa mih na ki palatchnong wa wan Iaw ki wym bien u pyrkhat yei khooid ka Iawmusiang. Da ong chooh u leh kiwa chnong dih kyiad hapoh kari leh noh ki ya ki song baam kat cha wa em ki.
U ma P. Lyngdoh u President ka JTES ong u wa lada ka chnong Mawlynnong ye ko u riñ ya ki bru na kylleiñ ka pyrthai yow wan pait ki yei khooid yong ka, ym toh iwa eh ya i leh u bood ya i nuksa yong ka.
U kongsan ha kani ka sngi u R. Muthu, SP West Jaintia Hills ong u wa emkaam bha u pynman ya kamni ki jait prokram neibhah emkaam u pynkynmoo paidbah yow man i kiwa pyrkhat yei khooid.
Ha chwa u kut ka yalang da saam ya ki tin nohjhep næ ki ‘Dust Bin’ cha ki dong wapher wapher yong ka Jowai, cha ki Petrol Pump, ka ophis u DTO, JHADC, Jowai Municipal Board, ki thaw pynyieñ kari wa em ha Jowai wa kiwi kiwi.
Da liwah leh ya ki tymbud luti ka Iawmusiang.
Ya kini ki tin da chna deiwa pyllang poisa ka Traffic Branch wa ki seiñ kiwa yah kari kamai kam ki local taxi, wa kiwa kamai kari tourist.
Discussion about this post