Shillong: U Chairman ka KHADC u Teinwell Dkhar ynne da kylli u ya ka Executive Committee wow wanrah ya ka rai (resolution) hajrong i kaam wa yatoh wa i kreh ya u sarok ar liang (two-lane) ha West wa South West Khasi Hills District, yeini da leh u heipor wa u CEM ka Council u HS Shylla hawa jubab u yeiwa wanrah ha ka dorbar tlang lada ka dorbar u chim ko ka rai hajrong kani ka phang.
“Ka Executive Committee ymye ko wow chim ka rai neibhah da rai wa hajrong i kreh ya kiwon kiwon ki sarok toh u rah bait ha ka dorbar,” da ong u Shylla.
Tangwa u Chairman da ong u wa lada man i iwa emkaam, ka Executive Committee toh u wanrah ko jar jiar ka rai hajrong ini.
Chwa ini, u Shylla da pynksan u wa ym em ka laad ya ka Council u pynlait ko T. 25 klur wow chna pynmiat (Repair) ya ki sarok ha ka thaaiñ.
“Kani ka poisa (T. 25 klur) da e da ka Committee warim lyngba ka Special Assistance Grant na ka sorkar pyrdi,” da pynrap u Shylla.
Ya kani ka phang chna sarok da wanrah da u MDC ka Council, u Hadrian Lyngdoh wow yaklam hajrong i eh i khoo ki paidbah kini ki ar District yei emkaam ya ki sarok, wei i chna ya kini ki sarok da pyrchah da ki kattu katni ki seiñ nei em u mar pohkhyndaw Uranium ha ka thaaiñ.
Neiliang u Lyngdoh da ong u wa ka sorkar pyrdi da pynlait ko ya kani ka poisa wow chna ya u sarok ar liang na Nongstoin cha Wahkaji heiwa i pyrchah toh ya i tih uranium, deiwa kyntu u leh ya ka EC wow thooh da kiwi ki laad hajrong ini.
Da kam u leh wa em 40-50 tylli ki chnong kiwa chem chitom neidaw wym em ki sarok wa biang deiwa pynrap leh wa da pynlait du T. 4 Klur na ka T. 25 klur da ka KHADC wow chna ya ki sarok chiliang (Single-Lane) ha ka thaaiñ.
(Feature Image- For Representational Purpose)
Discussion about this post