Khliehriat: Ka seiñ Meghalaya People’s United Front-East Jaiñtia District (MPUF-EJHD) hapoh i yahkhmat u President yong ka, u Michal Chyrmang ryngkat i emlang u President ka Khliehriat Circle, u Kyrshan Blah ynne ka sngi da e yarap ki da u khoo ar churia wa ka poisa cha kawi na ki manyung wa dooh ha Lumsken, East Jaiñtia Hills.
Katkam i yoo ka seiñ kani ka manyung yong u Handling Lyndoh wa ka Teilis Lamo dap ko dei chitom nadooh wa yoh kjut Cancer u na ktien u khlieh kani ka manyung, u Handling la kamwa chisnem da chitom u na ini i kjut, kamtæ ka seiñ da e yarap ko da ka poisa wa kattu katni hajar khnang wow yoh yarap u hawa lai thooh dawai neibhah ym em de yoh u wow lai kreh.
Kani ka manyung em ko le ngut ki khon wei du ka khon khaddooh wa ye ki u phah skur ha ki class khian hapoh ka chnong.
Ka seiñ da ong ko leh wa phylla ko wa wot ini i chem chitom ym em wa wyrai ki wot nadooh ki MLA wa ki MDC ka thaaiñ, kamjooh leh ki bru samen.
Hawa e i klam wa tbian, u Michal Chyrmang da ong u lada man u uwa mahajon kam kiwi daw e yarap u ya waroh kiwa em ha ka thaaiñ.
Ka seiñ da ong ko leh wa ynne ka sngi man ko i sdang hi-eh wei daw pteiñ ko u e yarap cha kiwi tawon kiwa dooh ka thaaiñ.
Discussion about this post