Jowai: Ka UDP Youth Wing, Shillong City da pynbna ko wow kyrchaan ya ka rai (Resolution) wa chim ka UDP CEC yow pyrchah ya ka Citizenship Amendment Bill 2016. Ka Party da pyrchah ko ya kani ka Bill kawa da wanrah ka sorkar pyrdi yow pynman aiñ ya ka.
Ka UDP Youth Wing da ong ko wa i pdiang ya ki Hindu, ki Sikh, ki Buddhist, ki Parsi wa ki Christian wa em ha Pakistan, Afghanistan wa Bangladesh yow man kam ki tre ri India pynyoo wa kani ka Bill toh kawa tympiah jaitbru kawa daw wanrah i awri awra hapoh ki jylla ka thaaiñ mihsngi kawa da sdang da ki yakhih paidbah ha waroh kawi ka thaaiñ.
Ka seiñ da ong ko wa u Narendra Modi da lai u pyrchah yei sñiaw ki paaid ri-loom wei ka BJP pyrkhat ko du yow pynkhlan ya ka ha ki kaam Politics khlem pyrkhat wow yada ya ki tre ri wa khian paaid.
Ka Youth Wing wing leh kyrchaan ko yei lai chimbynta kiwa yahkhmat ka UDP wow chimbynta ki ha ka All North East Regional Political Parties Meet ha Guwahati. The UDP Youth Wing, Shillong City da khut lang ko leh ya waroh ki Party ka thaaiñ mihsngi wow ya tylli lang ki neibynta ka jaitbru deiwa pyrchah ya kani ka aiñ.
Hei yatoh won wa i ya krehlang waka BJP hapoh ka sorkar MDA, ka Youth Wing da ong ko wa daw yaklam waka NPP yow dam noh u chim yei kyrchaan na ka BJP na ka sorkar synrop.
Da pynkut deiwa ong wa ka BJP da wanrah ko ya ini deiwa thmu wow pynku ya i boon Vote katwa ka Congress won toh kawa chaniah ha ki Vote yong ki Muslim, yow pynkylla ya ini, ka BJP kwah ko wow pynboon ya ka Vote yong ki Hindu iwa daw wanrah yei dooh i man tre ri ki khian paaid pyn hapoh ka ri yong ki.
Ini toh katkam wa pynlait khubor u Manbhalang M. Syiemlieh, Secretary, UDP Youth Wing, Shillong City.
Discussion about this post