Khlaad syndet u DM Wallang, u sahep wa maya kiwa boon

Jowai: U DM Wallang, MCS uwa jooh man kam u ADC ka West Jaiñtia Hills ha ki snem wa dadep uwa ksoh katni kam u Jt. Secretary ka chnat Urban Affairs Department da khlaad syndet u ynne ka sngi hadien wa suba wa yoh Stroke u ha kani ka thaw wa kreh yong oo wei da pynkit ya oo cha Civil Hospital Shillong.

U DM Wallang da sdang u kreh kam u Jt. Secretary haka 15-01-19 ha ka chnat Urban Affairs Department wei heipor wa em chwa u hapoh ka West Jaiñtia Hills District da jooh man u leh kam u Project Director ka DRDA hapoh ka District.

Heipor wa em u hapoh West Jaiñtia Hills da sdang u boon ki kaam wow kyntu kynrong wow e yarap cha ki bru khamtam kiwa im cha nongkyndong nadooh ki warep hadooh ki wa ri mrad, kiwa sa’ang dakha rang, ki kaam uiñke suwari wa kiwi kiwi.

Hapoh i yahkhmat yong oo ka WJH da yoh ko ya ka National Award hapoh ka kyrdan Effective Implementation of MGNREGS naka Ministry of Rural Development.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Heipor wa mih u na WJH da man ko ka por wa sñiawsih ya kiwa emkaam ya oo kamjooh i kmen wa da ku kyrdan u ha i kaam kreh sorkar u.

Mar ya tip yeiwa khlaad u, kiwa boon ki paidbah khamtam ki khynroo khyllood da sdang ki u thoh cha ki Social Media yeiwa da lehbha u kamjooh ki kyntien sñiawlem cha kiwa hayung hasem u. Da em leh kiwa da pynsñiaw yei doohnong wa khroo ya ka jylla hi waroh kawi nei khlaad uni u sahep uwa man u bru uwa minot wei uwa chemphang.

Ya ka sngi wow pyndep ya ka niam ka rukom ym em u tip kattæ.

(Kani man ko katkam ka yutip wa dang yoh heiyatoh wa ini i jia.)

Also Read: Yoh ka WJH ya ka National Award kam kawi ka District hapoh ka ri wa pliah u pynkrehkaam ya ka MGNREGS