Shillong: Rap nachwa uwa yahkhmat ka BJP ha kani ka jylla uwa man leh u montri ha ka sorkar MDA, u AL Hek da kam u wa em 10 ngut ki MDC na JHADC kiwa da pyntikna wow psiah cha ka BJP kiwa kynthup na Congress, UDP wa naka NPP leh, tangwa ynne ka sngi da yoo du ya ki MDC wa jop na ka UDP kiwa da psiah cha ka BJP.
Hawa kylli yei wiar yong kiwi won ki MDC kiwa thmu wow psiah cha ka BJP ynne ka sngi, neiliang u Nalin Kohli da ong u wa i pynpsiah dkhot ha ka Party ym pu kut ko hadooh katni neidaw wa ym em booh por ya kiwa kwah wan psiah.
Hawa kylli ya i yaklam ki MLA ka Congress kiwa thmu wow psiah cha ka BJP, u Kohli da ong u wa hadooh katni ym pu em uwi leh u MLA na ka Congress kiwa da yaklam wa oo hajrong kani ka kaam, tangwa neiliang u Hek da ong u wa em kamwa 8 ngut ki MLA ka Congress kiwa da yaklam wa kiwa yahkhmat ka BJP Meghalaya.
Hawa kylli chooh chooh, u Kohli da ong u wa ini i pynpsiah yong kiwa mihkhmat na kiwi ki Party cha ka BJP ym ktah ko ya ka sorkar synrop MDA, neidaw wa waroh ki Party ki pdiang ki ya kiwon kiwon wow psiah.
Discussion about this post