Shillong: U montri ka chnat Powerka jylla, u James K Sangma da kyntait u yei pynbaad wa em i baam-tooh hawa pynkrehkaam ya ka Scheme ka sorkar pyrdi ha jylla wa tip kam ka Saubhagya wei yeini da kyntait u hajrong ka phang wa wanrah da ka MLA ka Congress na Ampati, ka Miani D Shira heiwa u James da ong u wa ym slem de waroh ki manyung hapoh jylla u yoh bordiñ ki.
Kam wow pynkynmoo heini ka Congress da pynbaad ko wa em chiboon i baam-tooh hapoh jylla hawa pynkreh ya ka Saubhagya Scheme.
Hawa yaklam hajrong kani ka phang ki MLA ka Congress da kwah ki wow thung da ka takit wa laitlooid hajrong kani ka kaam heiwa uwa yahkhmat ka liang pyrchah, u Dr. Mukul Sangma da pynbaad u wa em i baamtooh wa joor (Big Scam) wei emkaam wow sangeh i yow myntoi ka jylla wa ki paidbah yong ka.
U Mukul da ong u wa em i leh tooh hawa khut ya ki Tender tangwa ka sorkar wa katni u kyntait bait ko yeitæ.
Hajrong ini i pynbaad u James da kyntait u ki waroh, wei da pynrap u wa i khut Tender man i iwa khooid.
Da ong u wa ka Meghalaya Energy Corporation Limited (MeECL) da booh ko ya ki kyndon wa khor wei u e kreh du ya ki Contractor wa ye u kreh yei kaam wei wow pyndep yei kreh hapoh i por wa da booh.
Heiyatoh wa em wa lai ujor mukotduma ha Meghalaya High Court wei da pyndam won ya ka hadien, u James da ong u wa ka liang pyrchah toh u wanrah ko yeiwa sakhiat ym wow mutdur wei pynbaad hi-eh neibhah uwa ujor da pyndam u ya ka mukotduma.
Da kdaw u wa hapoh ka Saubhagya i saam bordiñ cha ki chnong da man i iwa lai chaaid chaaid heiwa ha kini ki 6 bnai wa dadep 500 tylli ki chnong da yoh bordiñ ki katwa hapoh ka Deendayal Upadhyaya Gram Jyoti Yojana (DDUGJY) ha ki 3 snem wa dadep hadooh 1991 tylli ki chnong wa yoh bordiñ.
Rap hachwa yong ini i yaklam neiliang ka Shira da ong ko wa katkam ka Tender da booh kyndon wa u Contractor toh u man uwa da jooh chim yei kreh iwa T. 100 klur deiwa pynrap wa ini man i iwa eh bha wow yoh ya i kreh.
Discussion about this post