Jowai: Ka NPP Women’s Wing West Jaiñtia Hills chirup wa ka Jowai Block Unit ynne da yachem ko ya u MLA ka Jowai, u Wailadmiki Shylla ha yung ka Political Adviser ka NPP, ka Phidalia Toi ha New Hill, Jowai heiwa da ekti leh ya ka dorkhat ha u MLA.
Ha ka dorkhat ka seiñ kynthai ka Party da booh ko ya ki 9 tylli ki phang wa yatoh wa ka Jowai Constituency ka District wa ka jylla hi waroh kawi.
Ka Party da pynkynmoo ko wa ka Iawmusiang man ko kawi na ki thong wa da booh ko heipor Election katwa kamtæ da kyntu wow chimkhia wow pyndep noh u chna ya ka.
Da dawa wow pyndep yei chna ya ka Scheme saam um wa tip kam ka Umngot Water Supply Scheme, ka Party da kyntu ko ya u MLA wow chimkhia heiyatoh wa ki wakreh Workcharge ha ki chnat waphær waphær yow lait ki u chah beh kreh khamtam kiwa da kreh palat 5 snem kamjooh leh kiwa da palat i rta wow pynskem noh ya ki.
Chooh chooh ka Party da dawa ko wow pynyinsur yei rta wow yaleh kreh sorkar, da kyntu leh ya u MLA wow pynsmat u wai ya ka Maternity & Children Hospital ha Jowai khnang wow yoh kreh ki paidbah ka Constituency.
Wow pynyinsur ya iwon iwon i chna harood ka Wah Myntdu (500 meter) kamwa da khang da ka hukum ka NGT neibhah wa daw ktah i ya ki bru wa dooh wa em thaw harood ka wah wei wow chna ya ki Sewage Treatment Plant, wow chimkhia u chna ya ka Sewage Treatment Plant hajan yong ka Jowai.
Heijooh i por da kyntu leh ya oo wow chimkhia wow pynku ya ki kaam yalehke Sports ym du ya ka Football wa Badminton tangwa kiwi tawon ki yalehke neibhah ye ko wow yarap chiboon ya ki khynnah khynroo khyllood.
Khaddooh ki manbei da kyntu ki ya oo wow chimkhia yei roi i pynemkaam drugs hapyrdi kiwa khai khynroo neibhah ini ye i wow ktah ya ki hadien habood wei ye ki leh wow chah ktah ha ki jait kjut waphær waphær.
Ha kani ka yachem da emlang leh ki MDC ka JHADC wa kiwi kiwa kitkaam ka Party hapoh District.
Discussion about this post