Jowai : Ka State Commission for Protection of Child’s Right (SCPCR), Shillong ynne ka 12 tarik da pynman ko ya ka yalang paidbah ha District Library Auditorium, Jowai hei yatoh wow pynsñiawthooh ya ki paidbah hei yatoh wa ka aiñ Juvenile Justice Act 2015. Hei yakreh lang waka District Social Welfare Officer waka ophis ka District Child Protection Officer, Jowai.
Da pynman ya kani ka yalang neidaw wa man ko leh ka aiñ wa dang thymme ka wow yada ya kiwa boon jait ki kaam wa chah leh pyrchah yaki khynnah kamjooh leh kani ka aiñ ye ko u bichaar ya kiwa em 16-18 snem i rta kam kiwa heh (adult) lada leh ki ya ki kaam wa sih wa sang (heinous crime).
Ya kani ka aiñ da chna ya ka hadein i chah ksoh bor ka kynthai ha ki chynrang ha Delhi hapoh ka bus ha u snem 2012. Uwi na kini kiwa ksoh bor toh uwa dang 17 snem tangwa joor iwa emkti u ha ini i ksohbor da em i dawa na ki paidbah yow pynkreh ya ki aiñ yow pynchitom ya oo kam uwa a bru waheh (Adult).
Ha kani ka yalang ha kani ka sngi u H.M. Shangpliang, Director of Social Welfare Department ong u wa ha ka Observation Home wa em ha Shillong namo ka thaw sah ki khynnah hapoh 18 snem kiwa dang chah bichaar ha ka aiñ man ko kawa dap bait waroh chisnem. Ong u wa ini wadep da yachem u ha kani ka yung ya uwi u khynnah wa dang 15 snem wei da kylli u ya oo yei daw wa em u ha kani ka yung tangwa ym em jubab u ya oo. Hadien kiwa kreh ha kani ka thaw pyntip ki ya oo wa uni u khynnah toh uwa ksohbor ya kawi ka khynnah kynthai.
Da pteiñ u deiwa ong wa, i waroh haap bahkhlieh i yeini i hiar i dor i manbru i ha ka imlang sahlang, i thrang yong oo toh u yoo u wa kani ka Observation Home toh u man ko kawa thylli. Ong u wa ha Jowai sñiawsuk u tip wa ym em kitæ ki khynnah wa im wa sah cha sarok ymtoh kam ha sor Shillong.
Ha ka bynta wa bood yong kani ka yalang paidbah da yoh yei sikai ya ka aiñ Juvenile Justice Act 2015 na ka kong R.D. Kynjing DCPO, WJH kawa da batai chaphang ki kyndon aiñ wow yada wei wow bichaar ya kiwa em hapoh 18 snem i rta kiwa leh ya ki kaam pyrchah yaka aiñ weiwa i bor wei kaamram ka sorkar, ki pulit, ki seiñbhalang ye ki u yarap ya kam kini ki khynnah. Weiwa lada em kiwon kiwon ki wym ujor heiyatoh wa chah lehbeiñ ki khynnah ye ki leh u chah pynchitom hapoh kani ka aiñ.
Ka kong I. Warjri, State Resource Center for Women da khana ko ya ki khynnah skur wa emlang ha kani ka sngi yei ma i yachong kurim heipor wa dang khian na ki daw wa boon nadooh wa ym ye ki u psa khon, i yalait kurim kamjooh leh wa ym man i pyrkhat pyrdaiñ wa ye u sñiawthooh kammon i kaamram kam ka bei wow pa. I klam yong ka kong Warjri da yoh i yei ap ki khynnah skur sia næ.
Natlor ki khynnah skur da embynta leh ki seiñ wa ki pulit ka Jowai ha kani ka yalang.
Discussion about this post