Jowai: Ka lehkmen ya u moomer dap 25 snem i lai luti yong ka skur Jowai District Presbyterian School, Ialong wow e ya i chakri lyngba i stat i tip, da poi noh ko cha wa kut ynne ka sngi, wei da wan wow pynhaap pyrda da u montri ka chnat puræ ka sorkar jylla u Lahkmen Rymbui haka yalang wa da pynman ha pchem ka skur ha chnong Ialong West Jaiñtia Hills District.
Ya kani ka skur da seiñ nadooh u snem 1994 da ki 5 tylli ki Balang wa kynthup yaka Balang Jowai, Thadlaboh, Khimusniang, Mulang wa Mihmyntdu. Nyngkong da sdang naka Class Nursery ha ka yung chongwai ha Chutwakhu Jowai, wei katwa dang lai ki snem dang ku ko wei ha u snem 2000 da wai yaka kyrdan Upper Primary, ha u snem 2005 won da wai yaka Claas X tangwa da pyndooh noh yaka kyrdan Secondary ha u 2007 neidaw wa duna ki khynnah wa wan cha ha kitai ki Class, wei ha utai u jooh u snem yaka kyrdan Upper Primary da chimkti noh daka SSA wei da yoh boon ki myntoi.
Hadien i kreh chitom wa i thooh laad ka Education Committee wa toh u pait ya katai ka skur da yoh yaka thaw wow chna yaka yung skur wa pura ha Ialong wei da kyrriah noh yaka skur waroh kawi haka 22-02-2016, nalor wa da sdang biang yaka kyrdan Secondary.
U Lahkmen Rymbui hawa e yei klam kam u kongsan da u ong u wa hapyrdi ka yabeh thong wow yoh ya i stat i tip toh leh wow kyruiñ khmat neibynta wow kyntu wow pynpliah yaki sap wa i em i deiwa kreh chitom, neibhah wa waroh ki khynnah skur ki em ki ka yong ki hi ki sap wa da e kyrpang u Blai wei kawa kongsan toh wow sñiawthooh pynda i ya i hi kam kawon ka sap em i.
Da kyntu u leh yaki bei ki pa wow bichaar bniah ya ki khon wei ym toh wow nujor wa kiwi won ki khynnah. Da ong u leh ym toh du ki bru wa stat wa em yei sap, uwa ym em stat leh em hi u tangwa kawa emkaam dooh toh i kreh chitom.
Chooh chooh da kyntu u wa toh u chare yaki khon haki puræ yong ki neibhah wa boon ki bei ki pa na i yabeh yei stat da myllin ki wow sikai wow im da iwa bha wa ki luti wa toh u lai ki khon ki.
Heiyatoh wa ki kaam wa sih wa da roi bha ha kini ki sngi haka imlang sahlang, da khut u ya i ya krehlang yong waroh kiwa chong chnong ym toh wow ong wa da lait ki yong tæ da biang.
Kiwi de kiwa e yei klam ha kani ka sngi kynthup yaka Joint Director DSEO West Jaiñtia ka D. Khongiong, u Rev. D. Lyngdoh Chairman District Thadlaboh, u waheh chnong ka Ialong u Bichar Shylla wa kiwi haka yalang wa pynlai u Rev E. Nongpluh hei emlang leh kiwa kitkaam ki Balang waphær waphær ka Jowai District.
Ha kani ka jooh ka sngi da wai leh yaka Computer Room yong ka skur, nalor wa pyllait paidbah yaka kot Souvenir wei da saam leh yaki khusnaam cha kiwa jop haki yakob waphær waphær.
Da pynchongchit ya kani ka sngi daki chaad ki rwai wa kiwi de kiwa da chimbynta daki khynnah ka skur.
Discussion about this post