Jowai: Ka Jaintia National Council-Khliehriat Circle ynne ka sngi hadien wa ka seiñ da yoh ko ya ki ujor na ki paidbah ka thaaiñ heiyatoh wym pdiang ka SBI Khliehriat Branch ya ki Application kiwa thoh da i ktien Khasi neibynta kiwon kiwon ki kaam wei ini da booh ko yei eh ya ki paidbah ka thaaiñ khamtam ya kitu ki wym tip u puræ wei wow thoh da i ktien phareng khamtam leh ya kitu kiwa wan na nongkyndong ki wym tip yei ktien phareng boonsien ym ye ki wow pyndep ya iwa emkaam yong ki neidaw wa ym ye ki wow thoh Application da i ktien phareng wei ka SBI leh wym pdiang ko ya ki Application wa da thoh da i ktien Khasi.
Ka JNC-KC da lai yachem ko wa u Branch Manager ka State Bank of India Khliehriat Branch yow dawa na oo wow pdiang ya kiwon kiwon ki Application wa ki paidbah e ki ha i ktien Khasi lada emkaam ki ha kiwon kiwon ki kaam.
Neidaw wa u Branch Manager ym em u ha kani ka sngi neidaw wa lai Training u, da e noh yaka dorkhat ha u Manager In-charge, wei neidaw leh wa ym em ki tre chnong wakreh ha kani ka Bank, ka seiñ da kyntu ko leh ya uni u Manager In-charge wow booh wakreh da ki tre chnong khnang wow pynsuk ya ki bru khamtam ya kitu ki wym tip phareng wei wow pynchna noh yaka ATM wa neidaw wa man ko kawa ymhoi yow suk ki paidbah.
Ini toh katkam wa pyntip u Knermeki Rymbai, Publicity Secretary JNC-KC.
Discussion about this post