Shillong: Deilang waka ri waroh kawi, da lehkmen yaka National Press Day ha Shillong ynne ka sngi haka yalang wa pynman daka Shillong Press Club deiwa kyrchaan ka Directorate of Information and Public Relations ha Shillong Club.
Ha uni u snem da wan wow embynta lang u Meghalaya Information & Public Relations Minister, u A.L. Hek kam u kongson hei emlang u Founder President, Shillong Press Club, u Manas Chaudhuri, u Director, Information and Public Relations, u BS Sohliya, Joint Secretary to the Government of Meghalaya, Information and Public Relations Department u PM Sangma, President ka Shillong Press Club u David O Laitphlang, ki sahep sorkar wa kiwa thoh khubor.
U AL Hek hei klam yong oo da ong u i kamram ki laad pathai khubor man ko kawa emkaam chooh chooh haka juk wa katni heiwa i kwah yutip ki paidbah dang joor dang joor chooh chooh ko nadooh ki thaw wa em cha sor wa cha palat sor ym du na ki kotkhubor, ki Radio, ki TV khamtam ha ka juk Digital katni lyngba ki Social Media kam ka Facebook, Twitter, YouTube, Instagram wa kiwi kiwi, kamtæ ki laad pathai khubor emkaam ki wow krehkaam yow yoh yaka yutip wa tikna yow lai bait ka kaam synchaar paidbah.
Ka phang pyrdi ha uni u snem toh kawa ong “Reporting- Interpretation- A Journey”, heiwa u montri da ong u wa emkaam leh wow pynmih ya ki khubor wa bha deiwa ym em leh u khanglaad yei laitlooid ki laad pathai khubor wow khana yei hok. Da klam u chaphang wa joor i mih ki khubor thok ha ka juk kawa katni khamtam ha ki Social Media, wei da khut u ya ki laad pathai khubor wow yarap pynsñiawthooh paidbah yeini yow lait u mih ki sñiawthooh bakla kawa ktah yaka imlang sahlang.
U montri da pyntip u leh wa ka sorkar da yaleh ko wow yaklam wei wow yarap heiyatoh wa i eh i khoo wa yachem kiwa thoh khubor deiwa e yarap poisa ya ki Accredited Journalists lyngba ka Journalist Welfare Scheme wei da pyntip u leh wa sorkar dang yaleh ko wow wanrah ya ki Pension Scheme ya ki Journalist ka Meghalaya kiwa da chong ngiah kamjooh ki yarap lyngba ka Journalist Welfare Scheme neibynta ki Accredited Journalist kiwa dang kreh katni.
Ha kani ka sngi da em leh ka ya phyllu yumut heiwa da emlang u Founder President, Shillong Press Club, Manas Chaudhuri, Foreign Editor, Hindustan Times,u Rizaul Hassan Laskar kam ki bru chemphang.
Da pynkupburom leh ya ki Senior Journalists kiwa da e yei chakri yong ki da palat 25 snem wei da pynman leh ya ki yakob siat Carrom Board, Basketball wa Football kam chibynta ka lehkmen ha uni u snem wei da saam leh yaki khusnaam cha kiwa jop.
Discussion about this post