Shillong: Ka sngi wa khaddooh yong ka India International Cherry Blossoms Festival, 2019 Shillong kawa pynman ynne ka sngi, da man ko kawa chongchit bha heiwa da em ki kaam pynwyrngia paidbah wa ha rukom. Ya kani ka sngi khaddooh da wan sakhi da ki hajar ngut ki paidbah napoh ka jylla wa na baar jylla.
Ha kani ka sngi khaddooh da em leh ka rynsan phyllu yumut wow wanrah chooh chooh ya i yatoh lok hapyrdi ka India (Meghalaya) waka South Korea kawa tip kam ka Bilateral Summit.
Kam wow pynkynmoo wa ha uni u snem, ka South Korea toh ka ri kawa ksohkti lang ha kani ka Cherry Blossom Festival.
Kam chibynta wow pynkhlan chooh chooh ya i yatoh lok hapyrdi ki ar ri, da em leh ka pynyoo yaka phlim Korea kamjooh leh da wan uwa rwai K-Pop na katai ka ri, u Jang Hanbyul.
Da em leh ha kani ka sngi ya i dai baam tynre ha madan Polo Fifth Ground heiwa da yoh ki paidbah wow maad ya ki jait baam wa ym yoh na ki dukan.
U Ambassador ka South Korea cha India, u Shin Bong-Kil da wan u kam u kongsan wow pynhaap pyrda ya kani ka Cherry Blossom Festival, uwa da pynsñiaw yei sñiawphylla wa ki rwai K-Pop lane Korean Pop man ki kiwa pawnam bha ha kani ka jylla. “Nga kyrmen O wa ha kawi ka sngi, ki dhab rwai kam ka BTS daw wan ki wow pynchongchit ha kani ka nongbah,” da ong u Bong-Kil.
Da yooluti u leh wa ka South Korea u pteiñ ko yei krehlang kawa rap jan khamtam heiyatoh waka dustur riti wa ka yoh ka kot hapyrdi ka South Korea wa ka Meghalaya.
Ha i jooh i por da pynsñiaw u yei kmen wa u Montri Rangbah ka jylla, u Conrad Sangma daw lai u cha South Korea yow pynkhlan chooh chooh ya i yatoh lok hapyrdi ka Meghalaya wa South Korea. Da ong u leh wa chwa wow liwan u, ha kani ka sngi Bibar daw lai yachem u leh wa u Lat ka jylla, u Tathagata Roy.
Hadien ini da saam ya ki khusnam cha ki wajop ha ki yakob waphær waphær kiwa pynman ha kani ka tamasa.
Da emlang leh ha kani ka sngi u montri ka chnat Forest ka sorkar jylla, u Lahkmen Rymbui kam u symbood kongsan.
Ha i por janmiet yong ka sngi kut, da em leh ka ya tem lang ya ki rwai tynre yong Khasi wa Korea.
Discussion about this post