Jowai: Hanlada boon ki chnong ha ri-loom Jaiñtia dang pyrchah ki yow pynpsiah pyrtuid hapoh ka National Population Register (NPR) khamtam ki waheh chnong ka chnong Jowai kiwa hadooh katni dang kwah chwa ki u sñiawthooh ya kani ka NPR ha chwa u pynpsiah pyrtuid.
Ynne ka sngi won da sakhi won ha chnong Shangpung Pohchnong West Jaiñtia Hills District kiwa chong chnong da wan ki cha khmat yow krehlang waka sorkar deiwa pynpsiah pyrtuid ki hapoh ka NPR nadooh ki khynnah ki khynroo khyllood waki manbei manpa.
Ya ini i pynpsiah pyrtuid da sdang nadooh ka 25 tarik wei da leh yaka la 3 sngi lynter wei hapoh kini ki 3 sngi da palat 400 ngut kiwa wan thap pyrtuid yow yoh myntoi ki lyngba ka sorkar.
Heiwa yaklam wa u BDO ka Laskein u L.T. Tariang da ong u wa dang lai i cha khmat ini i thap pyrtuid hadien wa dep pynsñiawthooh ya ki paidbah kylleiñ ki chnong wa em hapoh ka Block Laskein. Kamtæ da jied yaka chnong Changpung kawa man leh kamka Model village wei da sdang chwa yei thap pyrtuid na kani ka chnong.
“Hadooh katni da sdang chwa ha Shangpung Pohshnong wei ya ini i thap pyrtuid daw pynman hadooh u bnai December wei katwa dang lai cha khmat i thap pyrtuid i pynche paidbah leh daw ptein i chaphang ka NPR.” ong u BDO.
Ha ini thap pyrtuid da chim ya ki Iris Print, ki fingerprint wei i chongdur leh. Hadien wa da dep lut waroh ini daw pynyoh won sa u Aadhar Number.
I myntoi uni u Aadhar toh yow tipmit ka sorkar wa toh ki bru man ki kiwa chong chnong pura, khnang yow yoh boon ki kaam pynroi na ka sorkar wa kynthup ya ki scholarship, ration card wa kiwi kiwi.
Nalor kine da ong leh wa deiwa yoh ya ka Aadhar Card uwi pa uwi u bru hei thaw u pynemkaam ki ya kiwi ki card yow pynsakhiat yei mantre ri ki da ye u pynemkaam du ka Aadhar Card donhi.
U waheh chnong ka Shangpung Pohshnong u S. Suchiang hawa kylli wa heiwon i rukom ki paidbah pdiang ki ya u NPR hanlada kiwa boon dang pyrshah ki. “Ha oo nga sniaw oo ya i pyrchah kiwa boon ya u Aadhaar em kiwa pyrchah ha i nongrim ka niam em wa ong wa toh u 666 tangwa nga hi samen ym em ngeit oo yeini.”
“I pdiang i neibhah i tip i wa khlem u Aadhaar i daw dooh i boon ki myntoi na ka sorkar, wei leh i tip che i waroh emkaam ya ki yarap naka sorkar.” ong u ma Suchiang.
Neiliang ki kattu katni kiwa chong chnong wa wan thap pyrtuid da ong ki wa ki ym tip ki iyi iyi chaphang ka NPR, ki wan ki hadien ba ki yoh ki i pynbna chnong na u waheh chnong wa lym wan pynpsiah pyrtuid ki daw dooh ki boon ki myntoi yong ka sorkar.
Katwa neiliang u BDO da ong u wa hadooh arsien da dep pynman awareness progamme, ye u man wa kiwa ym tip chaphang a NPR toh kiwa ym em wan cha ka awareness programme wei wa duna bha ki bru wa wan cha kani ka awareness programme.
Discussion about this post