Jowai: Ka Citizen (Amendment) Bill, 2019 ynne ka sngi da yoh ko yei mynjur hapoh ka Lok Sabah deiwa thap Vote heiwa kani ka Bill da yoh ko 293 Vote kiwa kyrchaan ka katwa ki Vote wa pyrchah da em ki 82 tylli. Wei ka yatai dang lai hi ko chakhmat heiyatoh wa kani ka Bill hadien i pynyoo ka Lok Sabha wa pdiang ko wow wanrah ya kani ka Bill.
Ya kani ka Bill da wanrah da u Union Home Minister u Amit Shah hapoh ka Lok Sabha ynne ka sngi heiwa waroh ki MP ka BJP da ya emlang ki.
Kani ka Bill da wanrah ko ya i yakhih ha kylleiñ ki jylla ka thaaiñ North East heiwa ha Assam kawa dang dep pynman wot yaka NRC da ong ki wa kani ka Bill daw pynyap ko yaka Assam Accord, 1985, kawa da booh yaka 24-03-1971 kam ka tarik wa khaddooh wow pdiang ya kiwa psiah chapoh ka ri India wow man ki kam ki tre ri katwa kiwa psiah hadien u kheiñ yaki kam kiwa chong ri pyrchah yaka aiñ deiwa khlem kheiñ yaka niam. Hapoh ka CAB won da booh wow pdiang ya ki Sikh, Buddhist, Jain, Parsi wa Christian kiwa na ri Afghanistan, Bangladesh waka Pakistan kam ki tre kiwa da em hapoh ka ri chwa namo haka 31-12-14 kam ka tarik wa khaddooh.
Neiliang u MP ka Congress u Shashi Tharoor haka yania hapoh ka Lok Sabha da pynsñiaw u yei pyrchah ya kani ka Bill wa tyngkheiñ ko yei hok man salonsar wa e hapoh ka ri kawa da e hapoh ka Article 14, i hok wym em ka yachah chilliang hakhmat ka aiñ, i yoh yada na ki aiñ ya waroh ki bru lada man ki tre ri wei kamjooh ya kiwa ym toh ki tre ri. Da ong u wa kani ka Bill da wanrah ko yei leh chilliang deiwa chah ya kiwa na ki 6 niam wow man ki kam ki tre ri wei da khang ya kiwa na kiwi ki niam.
Kiwa pyrchah da ong ki wa kani ka Bill ym em man ko katkam ki por wa katni wei man ko kawa lai chadien.
Haka yatai kawa joor bha hapyrdi u Amit Shah waka liang pyrchah, u Shah da ban joor u deiwa ong wa kani ka bill “tang 0.001% leh ym em man ko pyrchah ya ki khian paaid hapoh ka ri”. U heh ka Congress u Adhir Ranjan Chowdhury da ong u, “kani toh ka aiñ kawa mang du ya khian paaid ka ri”, katwa ka Party TMC da ong ko wa man ko kawa daw wanrah yei awri awra wa kawa man pyrchah yaka Constitution.
Ha iwi i bynta, u Shah da ong u bien hi u wow jubab ya iwi pa iwi wa kylli ka liang pyrchah lada ym mih ki (Walk Out) heipor wa jubab u.
U Shah da ong u wa kani ka Bill ym toh man ko pyrchah ya kiwa khian paaid wei i thmu yong ko toh yow chem ya kitu kiwa psiah tooh chapoh ka ri.
Heipor wa wanrah ya kani ka Bill, u Shah da ong u wa ka Congress da dep ko wow phiah yaka ri ha i pyrtuid ka niam wei na ini i daw emkaam wow wanrah ya kani ka Bill. U Shah da ong u leh wa ym em tyngkheiñ ko yaka Constitution, kani ka Bill toh wow pynman tre ri ya kiwa wym toh ki Muslim kiwa yut ri na Pakistan, Bangladesh wa Afghanistan kiwa maad yei chah lehbeiñ heipyrtuid ka niam. Chooh chooh da ong u wa ym toh du ini i sien wa pynkylla ya kani ka aiñ yow pynman tre ri, ha ki snem wa da dep kam ha u 1971 hadien wa yoh laitlooid ka Bangladesh, heipor wa em i chah thombor ki Indian ha Uganda, deiwa pynemkaam yaka yurim “Reasonable Classifications. “
Kani ka Bill kattu u lai ko sa cha ka Rajya Sabha yow yoh yei mynjur wei lada yoh ko yei mynjur daw man aiñ noh ko.
Update: Heipor chiteiñ synyaw da chim yaka Vote yow mynjur yaka CAB wei 311 Vote toh kiwa mynjur katwa 80 ngut toh kiwa pyrchah.
Discussion about this post