Ka Trinity Saioo kawa man kawi ka manbei wada chah jied haka sorkar India wow yoh yei naam Padma Shri hajrong i kreh chitom yong ka wow rep wei wow pynchlur u rep ya u chyrmit Lakadong kamjooh wow pynlai yaw ya oo, hawa yaklam wa u Wyrta haka sngi lehkmen Republic Day ha Jowai da pynsñiaw ko yei kmen wakhroo wa ka Sorkar Bei da tipmit ko ya ki kaam yong ka wei ini toh i yahluti u Blai neibhah da sdang kreh ko yeini nadooh u snem 2003.
Ka Trinity toh kawa na Mulieh, West Jaiñtia Hills wei sikai ko ha St. Magret RCLP School, Mulieh wei da emkti ko wow pynchlur wow rep ya u syiñ chyrmit ha kylleiñ ka Laskein C&RD Block.
Da ong ko wa ym em da dawa ware yaka wow yoh hadooh kat kani ka naam tangwa nei kreh chitom yong ka yoo ki sahep yei kaam wa leh ko kamjooh kiwi ki para warep leh da sakhi ki.
“I chah jied O wow yoh ya kani ka Award pynman ko yei thij i pyrkhat yong nga wow pteiñ chooh chooh chakhmat yei kaam khamtam hei wow pynmih pyrthai yow chyrmit Lakadong wa waroh ka pyrthai tip ki wa toh uwa bha tam,” da ong ka Trinity Saioo.
Kyrmen ko wa dei yah luti u Blai wa ki sahep u nang ye chooh chooh ko u pynheh wei wow pynsñiawthooh ya ki para warep wa kammon u sumaar ya u syiñ Lakadong uwa heh ka ‘Curcumin Content’ wei da pynemkaam ya oo ha kylleiñ ka pyrthai.
Ka Trinity da sdang ko wow pynchlur ya ki para warep nadooh u snem 2003 dei yarap ka Spice Board wa ki sahep sorkar.
Man u snem nalor wa pynchlur ko ya ki warep wow rep da yaleh ko u thooh ki laad yarap wow pynyoh ki Subsidy hei wow thied chyrmit khamtam nadooh u 2019 hadien wada sdang ya ka Mission Lakadong Turmaric da ye chooh wow pynheh ya ki yarap heiyatoh wa ini i kaam.
Da pyntip ko wa ynnin snem da yoh u wow pyllait hadooh 200 metric ton u symbe, da yooluti wa ha u 2020 leh daw ye chooh wow pyntam yei pynmih syiñ chyrmit naki snem cha ki snem.
Da ong wa ka thong hapoh kani ka Mission toh hawa kut hi i por ka Mission ha u 2024 u ye wow pynmih hadooh san hajar metric ton ha ki thaw wa rep ki oo, katni da kynthup lang ka Thadlaskein waka Laskein Block.
Ka khubor wa kwah ko u e cha waroh ki warep toh u ñiawkor yei rep khamtam ki mar wa kordor, kamwa uni chyrmit man uwa pawnaam bha waroh ka pyrthai tæ kwah ko waroh ki warep u rep ki oo wei u lehkhooid wei wow dam u e dawai, neibhah katni dawa bha ki ya uni u chyrmit uwa da rep khlem dawai.
Chooh chooh da ong ko wa kani ka Award ymtoh du kat ya ka donhi tangwa ya ki warep waka jylla waroh kawi kamjooh ki sahep ki chnat sorkar.
Kwah ko wa waroh ki bru u ksohktilang ki wow pyndep yei kaamram wei u pdiang u pynemkaam yei yarap na ka sorkar.
Discussion about this post