Dang pyrkhat ka UDP kammon wow leh ya i kaam pyrchah Party u Paul wa u Teibor

Shillong: Ka UDP daw chong yalang ko kammon wow chim rai hadien wa ar ngut ki MDC kitæ u Paul Lyngdoh wa u Teiborlang Pathaw da yaleh pyrchah ki ya ka Party deiwa lai kyrchaan ki yaka United Democratic Forum (UDF) wa yahkhmat da u Latiplang Kharkongor kam u CEM ha KHADC.

Kini ki ar ngut ki MDC da dep e jubab ki hapoh 24 kynta kamwa da paan ka Party hadien wa lai e ki yei kyrchaan cha ka UDF.

Hawa klam ynne ka sngi cha ki laad pathai khubor, u President ka UDP u Metbah Lyngdoh da ong u wa ka Party daw chong pyrkhat ko ya kani ka kaam mytu i janmiet lane mynstep ka sngi.

Da pynsñiaw u leh yei sñiawsih yei leh yong kini ki ar ngut ki MDC wei da ong u wa ki em ki boon ki laad wa ka Party ye ko wow leh yow wanrah yei sñiawthooh yumut biang.