Jowai: Ka seiñ Hynñiewtrep Youth Council (HYC) Jaiñtia Hills Unit kawa man kawi na ki seiñbhalang wa em hapoh ka lama yong ka CoMSO, hadien wada pynman ko yei pynsñiawthooh paidbah hajrong ka Inner Line Permit (ILP), kamjooh leh ynne ka sngi da saam yaki kot lakdop ha Jowai iwa pynche wei batai bniah heiyatoh waka ILP, da chim ko yaka rai wa nadooh ka 12 tarik uni u bnai daw booh hi ko daka yong ka hi ka khyrdop namo ka Check Gate yow kdoh u khoom yei wan psiah ki bru hapoh ka ri-loom Jaiñtia neidaw wa neiliang ka sorkar hadooh katni ym pu leh ko iyi iyi hajrong i dawa pynyoh ILP hapoh ka jylla Meghalaya.
Ya kitai ki soo tylli ki Check Gate wa ka seiñ da rai ko wow booh hapoh ri-loom Jaiñtia, kynthup ha Ratachera, Dawki, Namdong wa ha Saphai.
U General Secretary ka HYC u R. Lamare da ong u kam ka seiñ wa yakhih ILP, yoo ki wa hanla hadien wada chim yaka rai (Resolution) daka sorkar jylla leh ym pu yoo yaki dak ki chin wei da pynban du hei booh por bait neibhah nyngkong da ong hadien ka Christmas, neitæ hadien ka Republic Day wei katni won da ong hadien ka Election Delhi, kamtæ hajrong ini i leh stiñ ka sorkar, neiliang ka CoMSO ym banse ko wow chim yei bor ha kti.
Ha katai ka kot lakdop wada saam ynne ka sngi ha Jowai da ong waka Inner Line Permit (ILP) toh ka waitlam wow mait nei wan tyllep ki poiwiar yaka jaitbru nalor wa da pynche haroh heiyatoh kiwa boon ki phang wa ong wa ka ILP ye ko u ktah yaka jylla wa kiwi kiwi de.
Discussion about this post