Shillong: Ka BJP hapoh Meghalaya da rai ko wow chna daka Committee yow boodien waka Assam yow pynbait ya u pood kawa da sah kattu da boon snem.
“Ka Party daw embynta bha ko ha kani ka kaam wei daw chna yaka Committee yow thooh laad wow chem luti yow pynbait noh ya kani ka kajia pood,” da ong u BJP State President u Ernest Mawrie ynne ka sngi.
Da ong u wa ya kani ka Committee daw chna yaka ha u Wisu (March), wei daw yahkhmat ko leh ya ki bru yong ka yow yachem wa u Chief Minister ka Assam u Sarbananda Sonowal yow yaklam ya kani ka kaam.
U Mawrie da ong u wa ya kani ka rai wa da chim hadien wa ki Political Party da pynemkaam ki ya kani ka kaam yow yoh myntoi ki haka kaam Politics wei da mylliñ ki ya kani ka kaam du hadien wa kut ka Election deiwa pynkynmoo ya kiwa boon ki kajia wa mih hadooh wa dooh yei mynsien neidaw wa pynslem u pynbait ya u pood.
Da pdiang u wa i yaklam hapyrdi ki ar jylla ym em poi ki cheiwon cheiwon nachwa, tangwa sñiawskem u wa daw mankaam ko neidaw wa ha Assam da em daka sorkar BJP.
Hawa kylli kammon wow pynbait ya kani ka kaam uni u heh BJP da ong u wa ka Party daw trywa ko da i ya e kylliang chim kylliang.
Ha iwi tawon i liang da ong u wa ka Party da rai ko leh wow yah ya ki dkhot yong ka cha Delhi yow kyrpaad wow thap noh yaka ktien Khasi hapoh ka Eighth Schedule ka Constitution ka ri India.
“Daw pynman i leh yaka thooh bniah yow tip katwon ngut ki khynroo khyllood wa yoh kreh sorkar khamtam ha ki yung krehkaam ka sorkar pyrdi,” da ong u. Da pynrap u deiwa ong wa Party daw pyntikna ko wa biang i pynkrehkaam ki kaam pynroi kiwa sdang daka sorkar pyrdi.
Discussion about this post