Shillong: Hajrong i krehkaam ka sorkar Meghalaya Democratic Alliance (MDA) kawa emlang ka BJP, ka BJP da pynsñiaw ko wa ym sñiawhun ware ko yei rukom krehkaam yong ka sorkar.
U President ka BJP Meghalaya u Ernest Mawrie hawa klam ynne ka sngi cha ki laad pathai khubor, da ong u wa i krehkaam ym man ko kawa hun 100% tangwa ki paidbah rap sñiawthooh ware ki ya ini.
“Deiwa klam hok, ym man ko kawa hun nadong chadong ya i rukom kani ka sorkar MDA, em ki bynta ki wym sñiawhun,” da ong u Ernest.
Ha kani ka sorkar MDA, ka BJP da em ko uwi u montri u AL Hek katwa u Sanbor Shullai da man u kam u Chairman ka MTDC.
Hajrong i dawa wow pynkrehkaam ya ka Inner Line Permit (ILP) ha kani ka jylla, ka BJP Meghalaya da klam che ko wa ka kyrchaan ko ya i dawa pynkrehkaam ya ka ILP ha kani ka jylla.
U Ernest Mawrie da ong u, “Kamwa da rai ka yung dorbar kawa da emlang ki MLA ha kani ka sorkar, i leh yieñ lang ki ha ka jooh ka sur”.
Tangwa ka sorkar pyrdi dang puræ bniah ko kamwa leh haka Assam Accord neibhah wa yatoh ko waka riti synchaar ka ri.
Da ong wa ka BJP smat ko wow yah yaki seiñbhalang lada emkaam ki wow lai yachem ya kiwa yahkhmat ka BJP cha Delhi neibynta wow yaklam ya ka ILP.
“Ki seiñbhalang ym pu khut næ ong ki ya i wei lada emkaam ki, man i kiwa smat wow yah ki cha Delhi wow yaklam wa kiwa yahkhmat. I da pynsñiaw i ya ini i dawa ki paidbah ya ka ILP wei i burom i ya ini,” da ong u Ernest.
Hajrong i pyrchah ka sorkar jylla wow ekti ya ka kaam bamsap challan mooyong cha ka CBI wa da phah da ka Lokayukta, da ong wa kani ka kaam em ko ha ka kachari, wei ym ye u ong iyi iyi leh. Tangwa heijooh i por, da ong u wa ka BJP ka yieñ bait ko ha ka yurim wow pyrchah joor ya kawon kawon ka kaam baamtooh wei daw pynsñiaw ki leh ya ini cha kiwa yahkhmat ka seiñbei.
Discussion about this post