Jowai : Ka JHADC ynne ka sngi da pyndap ko ya ka chuki u Chairman yong ka kawa da sah thylli nadooh wa ieh syndet u Chairman warim yong ka u ma Laitsing Shylla ha ka 4 tarik u Naisan (May).
Ynne ka sngi hadien wa da yoh yei bor na u lat ka jylla da pynman ya ka Session yow jied thymme ya u Chairman yong ka Council heiwa da chah jied u Arbor Hima Darnei khlem em wa yeiñ pyrchah (Uncontested) ya oo ha pyrdi i mynjur lang yong waroh ki MDC ka JHADC.
U ma Darnei hei chimkti u ya ka chuki da e khublei ya waroh wa jied ki ya oo wei chwa u klam u da elaad chwa u ya kiwi u klam ki heiwa ki MDC ka JHADC da e khublei ki ya oo wei kamjooh leh kyntu ki wa u pyllai u ya dorbar ka Council deiwa man salonsar.
U ma K. Lytan hei klam e khublei u ong u wa u Chairman thymme toh em u i rta wa dang biang wei man u uwa stad kamtæ yoluti wa u ye u, u pyllai bha ya ki dorbar ka Council.
U ma J. Pyrtuh ong u wa da yoh u yoo bha yei rukom man u ma Darnei wei chem u wa man u leh u bru wa yieñ ha ka nongrim wa biang.
U C. Ksih ong u wa oo da yoh u yoo yei rukom kreh u ma Darnei nadooh wa man u kam u EM wei da chem u wa oo toh u bru wa stad bha heiwon heiwon i kaam wa kreh u.
U P. Iongloor ong u wa katwon sniawkmen u wa da chah jied u ma Darnei kam u chairman neidaw oo man u leh kam u lok wa jan bha yong oo kamtæ da kit bok u ya oo.
Neiliang u Chairman warim yong ka Council u ma Laitsing Shylla ong u wa kam u Chairman kattu toh u kreh u yei burom ka chuki kamjooh leh yei burom yong ki bru ka Constituency wa mih khmat u.
U ma Darnei hei klam yong oo ong u wa oo emkaam u yei kyrchaan wei krehlang yong waroh ki MDC neibhah oo ym em kam u wa da tip lut yei kaam thymme yong oo.
Heijooh i por ong u wa ynne ka sngi da pynsakhiat wa toh ki bru ka ri-loom Jaiñtia man sakhiat ki kiwa kyrpang kiwa ym em pait chiliang deiwa jied ki ya oo kam u Chairman neibhah oo man u kam uwa mih khmat ka Saipung ki jaid bru khian paaid hapoh ri-loom Jaiñtia.
U ma Arbor Hima Darnei kattu da man u kam u Chairman wa 27 yong ka JHADC.
Discussion about this post