Shillong: Ka Meghalaya Assembly ynne ka sngi da mynjur ko yaka Meghalaya Identification, Registration (Safety and Security) of Migrant Workers Bill, 2020.
Ya kani ka Bill da mynjur lyngba ka Voice Vote hadien wa ka liang pyrchah kawa da wanrah yei yong ka hi i pynkylla (Amendment Motion) kyntait ki wow kynran dien.
Ka liang pyrchah kwah ko wa kani ka Bill u lai ko cha ka Select Committee.
Ha chwa ini haka yatai, ka MLA ka East Shillong, ka Ampareen Lyngdoh da ong ko wa heiyatoh waka jylla kawa dang boodien wow pynkrehkaam yaka Inner Line Permit (ILP), lada em boonjait ki Agencies wa pynkrehkaam yaki Registration Cards ye ko wow wanrah yei kulmar.
“Toh u husiar bha i hawa lai chakhmat neibhah haki snem wow wan ye ko wow ktah yaka jylla,” da ong ka Ampareen.
U MLA ka Umroi, u George B Lyngdoh da ong u wa em boon ki duna ha kani ka Bill wei emkaam wow pyrkhat chwa wow mynjur yaka.
“Kwah i wow tip yei tlot i rukom e Labour Licence wa pynbor yaka sorkar wow wanrah ya kani ka Bill?” da kylli u Lyngdoh.
Kam wow pynkynmoo wa kiwa wan kreh mylla na baar hap ki wow yoh yaka Labour Licence chwa wow ye ki u kreh ya iwon iwon i kaam hapoh ka jylla.
U MLA ka Umroi da ong u leh wa ka Section 2 (K) kani ka Bill wailaad ko wow pynthut ya ki wakreh mylla ka jylla neidaw wa daw hiar i nong sngi iwa ki wareh na baar bien bait ki wow kreh.
Hawa e yei jubab, u symbood montri rangbah uwa pait leh yaka chnat Labour, u Prestone Tynsong da ong u wa kani ka Bill ym man ko kawa pyrchah wa kiwi ki aiñ wei ym ban ko ya kiwi leh ki aiñ.
U Tynsong da ong u wa kani ka Bill toh ka wow pyntikna wow em ki Registration Cards wei ki wow e du ya kitu ki wakreh kiwa ym toh kiwa napoh ka jylla.
Katkam i thong kani ka Bill toh u pynryntih ya kani ka kaam heijooh i por wow yoh ki wakreh mylla na baar yei chngaiñ deiwa yoh ki yaka ID kamjooh yei tipmit yaki.
Sa iwi i thong leh toh wow pynlait nei chah pyndik chah lehbeiñ ki wakreh mylla na baar jylla.
Discussion about this post