Ynne ka miet u montri rangbahdooh ka ri, u Narendra Modi da pynbna u ya ka Lockdown kawa 21 sngi namo wow khang ya ka ri waroh kawi heiyatoh wa i yakhun pyrchah ya u Coronavirus, ya uwa da tip leh kam u COVID-19 uwa da poor ha kylleiñ ka pyrthai wa ki jylla ka ri.
Kini hawah man ki ki bynta wa kongsan tam heiyatoh wa ini i pynbna u Modi:
U Modi da ong u wa ki khynnah hadooh ki waheh, uni u khñiang ym maap u yeiyi yeiyi wei i khalær kattu katni ye i wow ktah ya ki khynnah, ki khon ki kti, ki lok ki jor, ka manyung mansem leh waroh kawi wei ymye u kheiñsap hadooh katwon i dooh ka ri wa mih na ini i khalær.
Ha ki kattu katni ki tayaw wa dadep ki bru chemphang na kiwi ki ri da khana ki yei chitom yong ki hajrong i yakhun ya uni u khñiang.
Nadooh myntu i miet da pynmih ya ka hukum wow yada ya ka ri wa ya waroh kiwa chong chnong hapoh ka ri wow dam noh ki u mih na yung heiwa waroh ki jylla, ki District wa ki dong u man ki kiwa khang neibhah u man ko kam ka Curfew donhi.
Ini i leh daw ktah bha i ya i yoh i kot ki paidbah ka ri neini iwa daw khang hadooh 21 sngi wei kini ki sngi man ki, ki por wa kongsan tam.
Lada ymye u khang yei poor u COVID-19 ha kini ki 21 sngi daw chah ktah ki manyung, ki jan yung, wa kiwi kiwi katwa kamtæ emkaam wow neh bait ha yung.
Ymtoh u kheiñstiñ ya uni u khñiang neibhah wa ka World Health Organization katkam ka bui yong ka da ong ko wa na uwi u ye u poor uni u khñiang cha ki spah ngut ha ki 7-10 sngi iwa man iwa sñiawkhia.
Du hapoh 67 sngi da kynjoh 1 lak ngut ha kylleiñ pyrthai wei lada wyrchaw ha ki 11 sngi daw chah ktah 1 lak ngut, wei du ha ki 11 sngi donhi da chah ktah hadooh 2 lak ngut iwa man iwa sñiawkhia bha.
Ini i poor u khñiang ye i wow man iwa ymye de wow khang kamwa man ha China, US, France, Germany, Spain, Italy wa ha Iran.
Hanlada ka Italy namo ka US, i e sumaar ha kini ki ri man ki kiwa khroo tam ha pyrthai hanla kattæ leh ymye de wow khang ya i poor uni u khñiang.
Ki bru ha kiwa boon ki ri wa chah ktah ym de u mih ki chalait i yung dei tayaw deiwa bood ya ki kyndon wa da booh ki sorkar yong ki wei heini leh emkaam wow leh kamjooh.
Katkam wa man kattæ ka India dang pynkhreh ko wow yakhun deiwa kynmoo ya ki kyntien #JaanhaitohJahaanhai namo i mynsien wa im tæ i mynsien hi.
Emkaam wow man kiwa ye u yaichah wei kiwa em i mynsien raikut.
Da kynmoo leh ya ki Doctor, Nurse, Paramedical Staff, Pathologist, ki pulit wa kiwi kiwi ki wakreh ha ka bynta i chait i khiah, miet wa sngi wow pynim ya ki mynsien bru wow ngooh Blai ya kam kini ki bru kiwa yakhun pyrchah ya uni u khñiang.
Ka sorkar pyrdi yaleh bait ko wow yakhun pyrchah ya uni u khñiang, wow pynduna yei lut i san ki paidbah
Hajrong ini i yakhun, ki sorkar jylla krehlang ki wa ka sorkar pyrdi wei wa ka sorkar pyrdi da booh ko T. 15 hajar klur wow yakhun prchah ya uni u khniang.
Na kani ka T. 15,000 klur kynthup ko ya ki thaw sylli namo ki Corona Testing, Personal Protective Equipment (PPE), Isolation Bed, ICU Beds, Ventilators wa kiwi kiwi.
Da kyntu leh ya ki sorkar jylla wow man ki kiwa da pynkhreh.
Da kyntu ya ki bru wa em ki dak ki chin wow yaklam wa ki Doctor wei wow bood ya ki kyndon ka sorkar.
Kini ki 21 sngi ka Lockdown ye ko u man i por wa jrong tangwa emkaam wow yada iwi ya iwi khamtam ka yung ka sem.
Discussion about this post