15 49.0138 8.38624 1 0 4000 1 https://wyrta.com 300 0

Kyntu u Conrad yaki paidbah wym toh u kheiñstiñ yaka Lockdown

0 Comments
Advertisement ad1

U montri rangbah ka jylla u Conrad Sangma hadien wa pynbna u montri rangbahdooh ka ri u Narendra Modi yaka Lockdown ka ri wa 21 sngi kawa sdang nadooh pyrdi synyaw ynne ka sngi, neiliang Conrad lyngba ka Facbook da klam u cha kiwa chong chnong ka jylla yow e mynsien yaki deiwa ong wa ini ym man i iwa suk ya waroh wei da leh neibynta i bha i mait yong ka jylla wa yaka ri waroh kawi wa emkaam wow pyntkut yei poor u khñiang COVID-19.

Da pyntip u leh wa da dep rai chwa wow khang le sngi hapoh ka jylla heiwa ha East Khasi Hills District da pynkrehkaam da ka Curfew nadooh 9:00 P.M. ka 24th March, 2020 hadooh 6:00 A.M. ka 28th March, 2020. Wei cha kiwi ki District leh daw pynbna.

Da pyntip u leh wa ka sorkar jylla ym em chong klikti ko nadooh wa sdang wei da leh ko leh ya kiwa boon, wei heiyatoh wa kitu kiwa da wan na baar kam kiwa liwan yung da dep em 3300 ngut kiwa da Register wei dang boodien ya ini yow tip ki wow leh ya iwa emkaam. Da kyntu u leh ya kiwa ym pu em leh ya ini wow Phone ki ha u 108 wei ye leh u leh Online deiwa lai ha http://meghalayaonline.gov.in/covid iwa man iwa suk bha u leh ya ini.

Da ong u leh wa ka sorkar daw leh ko ya i kaam yong ka yow pyntikna wa ym duna ki mar wa emkaam man ka sngi khamtam ya kiwa dooh wa duk wa ya waroh leh kamjooh. Da kyntu u leh ya ki paidbah wow em ki yei kitkhlieh.

Da pyntip u leh wa ki wakreh kam ki Muster Roll, ki wakreh Job Card (NREGA) u yoh hi ki yaka nong yong ki katkam wa toh u yoh ki.

Da pyntip u leh wa da booh ya kiwa boon jait ki thaw booh ya kiwa chitom namo ki Isolation Ward ha kiwa boon ki District kiwa em le jait heiwa kiwa boon wa yoh ya uni u khñiang 80% toh kiwa ym toh kiwa ware, 15-16% kiwa joor wa 4-5% toh kiwa joor bha, kamtæ da pynkhreh yaki jait Isolation Ward deiwa pynchong yurim hajrong ini.

Da ong u leh waroh haap wow bood ya ini wa kynthup ya kiwa mihkhmat paidbah tangwa daw hap ki wow mih wow yachem yow yaklam ya kani ka kaam kamjooh ya ki bor Distrct wa ym man wow sangeh ki.

Da pyntip u leh wa ym em khang yaka Home Delivery System wei daw thooh laad kammon wow ye u leh ya ini wow pynpoi baam cha yung ki bru.

Heiytoh won wa em kiwa ym em chimkhia yei chong hapoh yung da kyrpaad u yaki wym toh u kheiñstiñ ya kani ka kaam hanla em boon ki kaam wa emkaam tangwa toh u ye ki u yang neidaw du deini donhi wa ye u pyntikan wa ym poor u khñiang.

Ya ki thaw Test da pyntip u wa nalor ka NEIGRIHMS, ka Nazareth Hospital leh da yoh bor ko wow leh Test naka ICMR wei daw pyrchang wow pynboon ya kini ki thaw Test cha kiwi ki District wei hap wow bood yaki kyndon chwa wow yoh yei mynjur.

Da pyntip u leh wa lada em ki dukan wa murieh yaki mar lane kiwa dai syad dor wow pyntip cha ki DC wei katkam ka aiñ Consumer Act daw leh ya iwa emkaam.

Lada em iwon iwon wa emkaam, ye wow thoh cha oo ha conrad.sangma@gov.in wei sñiawkmen u wow jubab wei da dep jubab u ya kiwa da dep thoh cha oo.

Da baan joor u yei emkaam wow chong hapoh yung wow ya krehlang wei wow yatylli yow poi chei jop.

Heiyatoh won wow e ya ki Pass heipor wa em ka Curfew, da pyntip u wa ki bru wakreh haki kaam wa emkaam ki wym hoi u dam kamjooh kiwa thoh khubor ye ki wow li paan Pass naki DC yong ki katkam wa emkaam wei daw chong hei rai ki DC.

Advertisement ad1

0 Comments

Leave a Reply