Shillong: U montri rangbah ka jylla u Conrad K Sangma da ong u wa ka mang poisa yong u snem 2020-21, toh kawa da saiñdur neibynta ka 10 snem wow wan ya ka jylla kawa da poi T.17,432 klur.
Hawa jubab ya i yatai hajrong i mang poisa hapoh ka yung dorbar ynne ka sngi, u Conrad uwa ksoh yaka muna poisa ka jylla, da ong u wa kani ka mang poisa da kyruiñ khmat cha ki kattu katni ki phang kiwa kongsan wei kitæ toh ka i chait i khiah, ka puræ puthi nalor ka rep ka riang waki kaam ri mrad.
Ki kaam pynroi, i seiñ kaam man ki leh kiwa ka sorkar jylla da pynlai yumut wow kyntu ya ka jylla.
Katkam i ong u montri rangbah, khnang wow pynsmat ya ki kaam pynroi, ka sorkar da pynkrehkaam ko da ki buit stat wa katni wow lum lang ya i yutip wei ini da pynsuk wow tip wei wow pynsmat ya ki kaam. Da ong u wa ha i por nachwa, teiñ teiñ da chim por le næ soo bnai du ya iwi i kaam wa khian tangwa katni da ki pariam kti da ye u leh ya i kaam.
Da ong u wa naka 20 lak klur wa ka sorkar India da pynbna u wow yarap ha kani ka yakhun ya u COVID-19, ka sorkar daw yakhun ko wow yoh boon ka poisa neibynta ki warep.
Da pyntip u leh wa ya ka Scheme 100 sngi næ NREGS, da pynku ya i yoh poisa na ka sorkar pyrdi hadien wa ka sorkar jylla da ye ko wow pynkrehkaam bha wei ha kani ka kynti ka jylla daw yoh kamwa T. 1300 klur.
Da pyntip u leh wa da chna 22000 tylli ki Self Help Groups ha ka jylla wei 4000 tylli da yoh ram lyngba ka Scheme National Rural Livelihood Mission (NRLM) wow kyntu ya ka yoh ka kot khamtam ki manbei.
Ha iwi i liang, u montri rangbah da pyntip u wa da pynlait lut ya ka MLA Scheme yong u snem 2019-20 wei da pynyisur leh ya ka kyndon ka Chief Minister Rural Development Fund.
Da pyntikna u leh wa yaka tulop waka bai Pension ki ASHA, Muster Roll u pynlait noh man u bnai kamwa yoh lang kiwi ki wakreh sorkar.
Ka sorkar da mang ko T. 200 klur naka kata hi ka jylla wow pynbha ya 250 tylli ki skur wow chna næ pynman kam ka Smart Class School wa sa 110 tylli ki skur daw pynbha na ka Scheme North Eastern Council (NEC) ha i lut kamwa T. 12 klur. Da mang leh T. 50 klur wow pynbha ya ki PHC wa CHC ha ka jylla wa T. 30 klur wow chna ya ki ophis Block.
Neibynta ki sarok da mang T. 1084 klur ya uni u snem wei ini kynthup wow pynbha ya ki sarok man i por khlem da yang hadooh wa sih ki.
Da pyntip u leh wa da hoi u pynhær yaki lieñsuiñ na Umroi sak cha Delhi kamwa leh na Shillong cha Kolkata, tangwa da sahteiñ wa poor u COVID-19.
Da ong u leh wa naka sorkar pyrdi da yoh ya i bhah kamwa da toh u yoh.
Ka sorkar da thooh laad ko leh wow pynbha ya ka rukom kynchew poisa na ki dan waphær waphær kam i pynbha ya i rukom lum dan deiwa pynemkaam da ki kor Computer ha ki Check Gate.
Da ong u wa i dai lilam ya u 2 lak metric ton u mooyong kamwa da e bor ka NGT daw sdang noh hadien wa pyndep ya iwa emkaam.
Hawa yatoh wa i chah kshoh ka tulop ki wakreh sorkar, u montri rangbah da ong u wa ka sorkar ym em ah ne pyndooh ko tangwa da ksoh du kattu katni bnai wei daw yoh biang hadien wa da wan dur kamjooh hadien wa wiar u COVID-19.
Discussion about this post