Ai ba u paidbah un bishar

Ka long shisha kaei kaei ka bym lah ban pdiang ha ka ri synshar paidbah kaba ka sorkar ka dei jong u paidbah. La jied ia ki nongmihkhmat bad la thaw sorkar bad la ioh ban synshar. U paidbah u khmih lynti bad angnud ban iohi ia ka jingtrei hok jong kano kano ka sorkar kaba ioh ban synshar.

Hynrei ki jingkhmih lynti u paidbah ka long da khongpong ha ka jingiadei bad ka surok NH-6 ka la paw ka jinglehraiñ kaba khraw ha khmat ka pyrthei namar ka jingsniew kane ka surok bah ka la long Viral bha kylleng ki jylla hapoh ri India. Kiba iaid lyngba kane ka surok ki la sakhi. Kat kiba iohi ia ka jinglong jingman kane ka surok ka jingmut jingpyrkhat kiba bun balang ka dei beit namar ka jingbymshimkhia lane ka jingthurmur ka sorkar lane ioh don eiei ka jingbamsap ba shyrkhei.

Kane ka surok ka la sdang ban paw ka jingjot naduh ka snem 2022 bad suki suki ka la long haduh katne ka jingjot rathai namar ka jingbymdon ba iohi na ka liang ka sorkar ne na ka NHAI. Haduh mynta katne ka jingsohsat ka leit ka wan ki paidbah, pynban ka sorkar jylla ka sngap jar jar ka khlem leh eiei. Ka sorkar ka kynnoh ba dangdon slap ym pat long ban ai bsiang. Ka jingkylli ka long hato ym don lad shuh da kumwei ban leh Repairing ne pyndap khyndew, ki maw ha kito ki jaka ba long kyrkieh eh ka jingdonkam ban leh kumta?

Ko sorkar ki paidbah kim khmih lynti ba phan ai bsiang ha por lyiur namar la tip hi ym long ban leh kumta. Lada ka sorkar ka ong ba ym long ban trei mynta namar dangdon slap te kata ka mut u paidbah ruh un shong shwa khop ha ïng ym dei ban mih na ïng ban leit trei ne leit ïew leit shim dawai, kata tharai ka jingmut ka sorkar. Uba bun balang u tip shai ba don shibun ki lad ne Options ban leh eiei ia kane ka surok ha kane ka por ba dangdon slap. Hynrei lyngngoh pat ba ka sorkar kam tip, kane ka long kaba phylla shisha. Ka sorkar ka hun ban sngap beit jlang khlem leh eiei. Ka jingkren sharum shaneng jong u paidbah ka long ba kim pat ju iohi koit kum kane ka surok ha ka jingim jong ki naduh dangrit.