Ka Dorbar Chnong Cham Cham, East Jaiñtia Hills ynne ka sngi da pynman yalang ko ha Sahksaw yow wai ya ki thaw uiñke suwari wa kyntup ya ka Rynji Falls & Sahksaw Tourist Spot deilang waka Sahksaw Suspension Footbridge heiwa da wan wai ya kini da u Montri ka chnat Tourism, u Paul Lyngdoh kam u kongsan wa u Montri ka chnat Revenue & Disaster Management kam u symbood kongsan deiwa emlang u CVD Diengdoh, Director ka chnat Tourism wa kiwi kiwi de.
Ya ka yalang da pynlai da u Assistant Waheh Chnong, u Stop Phawa heiwa da yoh ya i klam pdiang burom na u Secretary Chnong, u Dibol Dkhar uwa da diang burom ya waroh ki waheh chnong wa ya ki bru paaw khmat nadooh ki MDC kam u Finelynes Bareh, u Lomris Lyngdoh wa u Waheh Chnong ka Cham Cham u Karlud Dkhar.
Ha kani ka sngi da klam neibynta ki thaw uiñke kiwa em cha kini ki thaw hapoh u pood u ang ka dorbar chnong nadooh ka Kchaaid Rynji, Sahksaw, ka View Point wei i bynta chaneiñ wa rap chyiap wa tip kam ka Marang Beach kamjooh ka Moosata.
Neiliang u waheh chnong da angnood u wa neini chakhmat daw chna pynmiat ya kini ki thaw lyngba ka Scheme 100 sngi.
Da e leh ya ka dorkhat da u General Secretary ka Sanchnong Welfare Association, u T. Pdein cha waroh ki waheh wa man kiwa mihkhmat sorkar.
Da khana leh ya ka parom na ka manbei ka Doni Phawa chaphang kini ki thaw uiñke.
Neiliang u MDC ka thaaiñ, u Lasky Rymbai da kyntu kynrong u ya ka chnong Cham Cham wow man kiwa tylli lada heiwon iwon i thaw.
Da yoh leh i klam leh na u Deputy Commissioner ka East Jaiñtia Hills, u Abhilash Baranwal uwa da kyntu ya ki chnong waroh u yalehbha ki wei wow man kiwa sñiawthooh bha hawa em kam kini ki thaw uiñke wa da e u Blai.
U Kyrmen Shylla da khana u leh chiboon ki kaam wa wanrah Scheme u wei da yarap u leh wow yaklam wa ki chnat sorkar nadooh ka chnat Tourism wa ki bor District wei da angnood u leh u pynlait ya u sarok na Lumchyrmit cha Skhentalang wei wow pynheh ya u sarok Mukhaialong-Lumchyrmit Road khnang wow suk ki kari u lai uiñke cha kini ki thaw.
Neiliang u Paul Lyngdoh da khana u wa da em ki Scheme wa da dep booh wei dang yang u wow sdang biang neini chakhmat yei kreh ya ka Kchaaid Latang kawa em ha Lumchyrmit, ka thaw pynyieñ kari ha Kchaaid Rynji wa kiwi kiwi.
Kani ka yingkieñ doi-doi namo ka Suspension Bridge toh kawa da chna lyngba ka poisa wa yoh naka District Mineral Foundation Trust 2018-19 hei lut wa Rs. 93,85,900.
Da yoh leh i klam na u Phervison Nongtdu uwa man leh u Principal ka East Jaiñtia Eastern College, u C.V.D. Diengdoh wa kiwi kiwi.
Discussion about this post