U President ka Meghalaya SSA School Association (MSSASA), u Aristotle Rymbai da pyntip u wa ka sorkar da mynjur ko wow su noh chwa ar bnai ka tulop kawa da sahkut hadooh 5 bnai, itæ yong u Naichiphaw wa u Khonchonglad (Nov) 2021, wei neibynta ini da em i pynbait na ka chnat wow pynemkaam da ka poisa ka sorkar jylla, katwa kawa sah yong u Kmaichonglad 2021, u Duyatra wa u Thohlakhmi 2022 daw pynlait mar ya yoh poisa na ka sorkar India.
Kiwa sikai ka Samagra Shiksha Abhiyan (SSA) ynne ka sngi da pynman ki ya ka yakhih deiwa lai paidbah nadooh na thaw pynyieñ kari wa em ha Polo cha Secretariat wow dawa ya ka tulop kawa da sahkut kattu la 5 bnai. Neidaw wa da yakhih deiwa mih sarok kiwa sikai, neiliang u Montri wa pait ya ka puræ puthi ha ka jylla, u Lahkmen Rymbui da khut yaklam u wa kiwa sikai wei da kular u wow pynlait noh ya ka tulop kawa sah.
Katkam i ong u President ka MSSASA, i yachem ynne ka sngi wa u Montri da em kajiak i kylla neibhah ha ki 5 snem wa da dep, ka sorkar ym em leh ko iyi iyi katwa katni neiliang ka sorkar jylla lyngba ka chnat muna tangka daw su noh chwa 2 bnai ka tulop na ka T. 104 klur kawa em ha ka sorkar. Da ong u wa ya ka rai wa khaddooh daw chim bait deiwa ya syllok wa waroh kiwa sikai SSA.
Hawa kylli, u President da ong u wa kiwa sikai SSA ym toh wa pyrchah ki ya ka sorkar, tangwa wow dawa yei hok, wei pynsñiaw u hakhmat u Montri wa toh u pynbait noh ya kam ini i eh khnang wa kiwa sikai ym emkaam ki wow mih cha sarok wow dawa ya ka tulop.
Da ong u leh wa neiliang ka Association da e yumut leh wow wanrah ya ki Policy kamwa da leh ya ka tulop yong kiwa sikai Adhoc wa Deficit lane deiwa pynlait bait chisien 3 bnai khnang wa kiwa sikai SSA leh u sñiawthooh ki kammon wow pynlai yeiwa emkaam ha ki yung ki sem. Da ong chooh chooh u wa neiliang u Montri da kular u wow chimkhia wei daw pynsñiaw leh hakhmat u Montri Rangbah.
