Ka Synjuk Waheh Shnong East Jaiñtia Hills District (SWSEJHD) ha ka Executive Committee yong ka kawa da pynman jhan ha Community Hall, Khliehriat West da chrai bha ko hajrong i wym bien ka sorkar jylla wow chimkhia wow pynbor namo u hukum ya ki bor wa toh u pait yow sarok NH6 wei yow sarok Sutnga-Saipung wow phah pynchna noh wut-wut neibhah ki sarok toh kiwa da sih sakhiat cha palatpood.
Katkam ka khubor wa da phah da u President yong ka SWSEJHD, u Hambertus Nongtdu, da ong wa u sarokbah National Highway 6 uwa lai lyngba yong ka Jaiñtia Hills, nadooh Soomer, West Jaiñtia Hills hadooh Malidor, East Jaiñtia Hills da jæd da pra bha u ha waroh tymbud luti. Katkam wa man kattæ, ha kiwa boon ki bynta yong uni u sarok, da mih sa du ki thlu ki krem, wa i nan um nadooh ki khian hadooh ki heh, iwa da pynthut pynjynjar sakhiat yei lai i wan yong ki paidbah yong ka jylla Meghalaya wei kamjooh leh yong kiwa na kiwi tawon ki jylla ha ri India.
“U sarok NH6 toh du oo don hi u budloom yong ka lai ka wan yong ki paidbah yong ki jylla waphær waphær ha ri India, khamtam kiwa na North East India. Tangwa i long i man yong uni u sarok katkam wa man kattæ da booh ko ya ki paidbah wa lai wa wan hei eh i khoo wei hei maa iwa joor bha, neidaw wa boon i sahkut kari, neiwa sih kari heh ha pyrdi sarok da chem jinjar kiwa kjut wa chitom wei nei hap wow yait thlu yait krem iwa ye u wanrah yei jia wa sñiawsih ya ki paidbah wa lai wa wan,” ong u Hambertus Nongtdu.
U President ka synjuk ong haroh u, “Iwa phylla hadooh kattæ kattæ toh wa ka sorkar Meghalaya tip bha ko yei rukom man uni u sarok ha waroh ki liang wa kynthup yow sarok Sutnga-Saipung, tangwa tip neiyi i daw wa suki bait ko kiaw ne khlem leh iyi iyi leh neibynta uni u sarok kat hadooh ynne ka sngi. Ini i rukom leh yong ka sorkar jylla kamni toh wa yoobeiñ wei kheiñpoh ko ya i ki paidbah, khamtam ya kiwa na East Jaiñtia Hills kiwa hap u chah chitom hei lai luti man-ka-sngi lyngba yong kitai ki sarok”.
“Kam wow pynkynmoo wa ha ka 2 tarik u Naisaphra, kiwa yahkhmat ka SWSEJHD, da lai yachem kyrpang ki deilang wa ka dorkhat ya u Chief Minister, ka Meghalaya, u Conrad K Sangma, weiwa kawi na ki phang wa hakhmat dooh wa da yaklam ki wa oo toh yow pynchna noh wut wut yow sarok NH6 wei ya u sarok Sutnga-Saipung, heiwa u Chief Minister leh da kular u ya ki wow leh yeini, tangwa kattu da tam chi bnai ka sorkar ym em u leh ko iwon iwon leh heiyatoh wa kitai ki sarok khamtam yow NH6, uwa man u thied snaam yong kiwa boon ki jylla ha ka ri India. Ini i leh yong ka sorkar Meghalaya da pynchrai bha ko ya ki paidbah, khamtam ya ka synjuk wa ya ki paidbah yong ka East Jaiñtia Hills kat hadooh wa hap noh i wow chim da kani ka rai kawa khor,” ong biang u Hambertus Nongtdu.
Kat da kamtæ, lyngba yong uni u kyrwoh, ka SWSEJHD phah ko ya ka wyrta kawa che kdar cha ka sorkar jylla, wa u e por ko ya ka sorkar jylla hapoh ar tayaaw donhi nadooh wa pynmih ya kani ka khubor, wow pynchna ya kitai ki sarok pyn ar tylli wei lada jia wa ka sorkar ym leh ko iyi iyi hajrong ini, ka synjuk ym yohsa ko u chim da kiwi tawon ki rai kiwa khor bha ki wow pynpai chkoor ya ka sorkar jylla, weiwa lada jia wa poi u pood kat chadooh cheitæ, lada mih iwon iwon i wym sñiawsuk heini heitai, ka sorkar jylla hap ko wow chim yei kitkhlieh ha ka da hi,” pynkut u kyrwoh na ka SWSEJHD.
Discussion about this post