Shillong: U MP ka Congress na Shillong u Vincent H Pala da ong u wa i thmu yong ki kattu katni ngut ki MLA wow mih noh na ka party boi ye u man wa yoo ki wa ka party ym poi de ko heibor ha ka Election wow wan tangwa ympu tip yi mutdur ki neibhah ye u man iwa bakla.
Hawa yaklam wa kiwa pathai khubor u Pala da ong u wa i kynrum kynram ha ka party ymtoh iwa thymme tangwa katni man i iwa joor neibhah wa ki MLA kiwa da rim da mih ki na ka party kam u Prestone Tynsong, u Sniawbalang Dhar, wat u Ngaitlang Dhar wa u Rowell Lyngdoh.
“Ka kynrum kynram man ko chibynta yong ka Politics tangwa heini rap joor i neibhah ka BJP em ko heibor ha Delhi. Ki mih ki ymtoh wa yootaroi ki ya ka Congress tangwa mutdur ki wa ka BJP kawa em heibor ha Delhi daw embor ko wot ha kani ka jylla leh” da ong u Pala.
Da ong u wa ki MLA khlem i bor ymye ki u leh iwon iwon leh wei na ini i daw mih ki, tangwa ymye u beiñ ya uwon uwon tangwa chong ko hei stat yong ki.
Da pynrap u leh deiwa ong wa i thmu wow pyndam ya ki 7 tylli ki Block Congress toh i stat wa i chemphang u President ka MPCC u DD Lapang uwa da em ha ka kaam saiñ pyrthai la palat sanphaw snem kattu.
“Wow yada ya i thmu wow pynsnih dur ya ka party wei kam ka party ymye ko u chong te pait hi-eh yei thmu ki wow leh pyrchah ya ka party da kamtæ da chim noh ya kani ka rai” da ong u Pala deiwa kam wa i leh ka MPCC ymtoh iwa bakla.
U Pala da kam u leh wa da tip u wa daw mih noh ki na ka seiñ wei da yaklam u leh wa u Lapang hei yatoh wa ini neibhah wa emkaam u leh yeiwa emkaam ymtoh wow yang hadooh wa mih ki.
Da kyntait u wa toh i bor ka BJP wow tympiah ya ka party, tangwa da ong u wa toh i bor pyrkhat samen yong ki samen wa ka Congress ympoi de ko heibor.
Hawa kylli wa lada ka Congress daw wan biang ko heibor, u Pala da ong u wa i por dang smat ware i wow klam yeini wei wot ka party leh ympu em u pynbna kyrtong ko.
Discussion about this post