Jowai: Ka yungkrehkaam, u Asst. Agriculture Engineer (Mechanical), Jaiñtia Hills wa em ha Rymphum, Jowai da kem diñ ko ynne i step synyaw wei i diñ da baam lut ko ya waroh iwa em yong katai ka yungkrehkaam hadooh wa da iñkhaw lut riaw.
Ka yutip wa da yoh na u sahep katai ka yung krehkaam u F. Thabah Asst Agriculture Engineer Mechanical, da pyntip u ya i diñ da yoo nyngkong da u chowkidar wa sah hajan katai hi ka ophis ha i por 01:00 waje i step synyaw wei da pyntip u cha ki wei neiliang yong oo da pyntip u cha ki cha ki bor ki pulit.
Katkam ki dak ki chin ha i por wa wa yoo u chowkidar, i diñ da poor naka kamra warim yong katai ka yungkrehkaam hadooh wa poi cha ki kamra wa da pynyabi rap hadien.
Ha ini i jia, ka yungkrehkaam da dooh lut ko ya waroh i em wa kynthup ki 2 tylli ki Computer, kawi ka Xerox machine, ki duli, ki chuki, ki kot ki sla wa kiwi kiwa da iñkhaw lut.
Neiliang ki bor pulit leh lyngba ka Fire Emergency Service, mar ya yoh yutip ki da hiar ki cha kani ka thaw yow tympleh tangwa neidaw waka ophis leh man ko kawa da rim bha, i diñ da poor smat ko wei da baam dooh ya waroh.
Ynne i step won neiliang u Dy. SP Headquater M.J. Marngar, u Additional SP B. Chetri deilang wa u O.C. ka Jowai Police Station nalor kiwi ki sahep da hiar lai sylli ki ya kani ka ophis.
U Dy. SP da ong u wa ha kam kini ki por, ki paidbah ye ki wow mutdur da iwi iwi, tangwa katkam ki dak ki chin da suba wa i kem diñ hi toh neidaw wa kopdiñ u wire bordiñ neidaw wa ha i thaw wa pyndait ya u Meter bordiñ da man u wa ki Wire kiwa da iñkhaw lut.
Discussion about this post