Shillong: Ka MLA yong ka National People’s Party (NPP) kawa dang chah jied thymme na Selsella Constituency, ka Ferlin CA Sangma ynne ka sngi da baam smai ko kam ka MLA wa pura. Ya ka Ferlin da pynsmai da u Lamphang ka yung dorbar Meghalaya Legislative Assembly, u Dr. Donkupar Roy ha yung krehkaam yong oo ha nongbah Shillong.
Ha kani ka sngi da synraan lang ya ka da ki MLA ka NPP wa kynthup ya u symbood Lamphang, u Timothy D Shira, kiwa kyrchaan ka NPP na Selsella wa kiwa hayung hasem yong ka. Ha ini i pynsmai da sakhi wa tang uwi wot leh u montri ka sorkar Meghalaya Democratic Alliance (MDA) ym em poi ki kamjooh leh ki MLA ka liang pyrchah.
Ka Ferlin jooh man ko ka sahep MCS wa da chong-ngiah wei da pynrem ko ya ka kyrtong ka Congress kawa man ka kurim u MLA warim wa da khlaad noh, ka June Eliana R. Marak da 4,369 vote ha ka Election chiteiñ samoi na Selsella.
Ya kani ka Election chiteiñ samoi da pynman hadien wa khlaad syndet u MLA warim na ka Congress uwa jooh man leh u Montri warim ka jylla, u Clement R Marak.
Da i jop ka Ferlin, ka NPP kawa yahkhmat ya ka sorkar MDA da skem chooh chooh ko deiwa kynjoh cha ka 21 ngut ki MLA ha ka yung wa 60 ngut.
Ka Ferlin hawa e yei klam da ong ko wa ka thong wa hakhmat dooh wow kreh ko toh neibynta wow rah ya ki kaam pynroi wei wow kynrong kyntu ya ka Selsella Constituency wei kamjooh leh ya ka jylla.
I emkaam wa hakhmat dooh ha Selsella toh ki luti syngkieñ kiwa bha, ki thaw puræ kiwa katkam ka juk wa katni wa i chait i khiah wa kiwi kiwi.
Da ong ko wa hadooh katni ka Constituency toh kawa dang sahdien bha wei u man ko ka thong kawa eh bha neibynta wow pynmankaam yeiwa emkaam ki paidbah ha kani ka Constituency, tangwa daw pyrchang hi ko katwa ye wow leh yeiwa emkaam kamwa da angnood ki paidbah.
Discussion about this post