Ki 8 ngut ki Montri thymme ka sorkar Meghalaya Democratic Alliance (MDA-II) da baam smai ki ynne i janmiet wei ya kini ki Montri thymme da pynsmai da u Lat ka jylla, u CH Vijayashankar heiwa da sakhilang da ki Montri sorkar wa kynthup ya u Montri Rangbah, u Conrad K Sangma, u Prestone Tynsong, u Sniawbhalang Dhar wa u Marcuise N Marak, najrong ki heh sorkar wa kiwa yahkhmat ki seiñ wa ya krehlang hapoh ka sorkar MDA.
Ki Montri thymme ha ka sorkar MDA-II toh u Deputy Speaker warim uwa man leh u MLA ka Resubelpara, u Timothy D Shira, u MLA ka Dalu, u Brening A. Sangma, u MLA ka Jirang, u Sosthenes Sohthun, u MLA ka Jowai, u Wailadmiki Shylla, u MLA ka Mawshynrut, u Methodius Dkhar, u MLA ka South Shillong, u Sanbor Shullai, u Speaker warim uwa man leh u MLA na Mairang, u Metbah Lyngdoh wa u Montri warim uwa man leh u MLA na Amlarem, u Lahkmen Rymbui.
Ha ini i kylliang chuki, da em soo ngut kiwa na NPP kiwa da chah pynhiar chuki wa kynthup ya ka Ampareen Lyngdoh, u Comingone Ymbon, u Abu Taher Mondal wa u Rakkam A Sangma, ka UDP da kylliang ko ya waroh ar ngut ki yong ka deiwa pyndooh noh ya u Paul Lyngdoh wa u Kyrmen Shylla, katwa ka HSPDP wa ka BJP kiwa em mar ar ngut ki MLA da kylliang da uwi won heithaw u Shakliar Warjri wa u AL Hek.
Ha ini i pynsmai ya ki Montri thymme, ki montri warim kiwa khlem poi toh ka Ampareen Lyngdoh wa u Paul Lyngdoh.
Discussion about this post