15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Baam smai u Dasakhiat wa u Renikton kam ki Montri ha ka sorkar MDA

Advertisement ad1
Advertisement ad1

Shillong: Ka sorkar wa yahkhmat da u Conrad K Sangma yong ka National People’s Paarty (NPP) ynne ka sngi da pynpsiah thymme ya 2 ngut ki Montri deiwa pyndam noh ya 2 ngut kiwi hadien ka samoi krehkaam da lai ko kattu la 2 snem chiteiñ.

Ki Montri thymme ka sorkar Meghalaya Democratic Alliance (MDA) kiwa da chim smai ynne ka sngi toh u Dasakhiatbha Lamare uwa man u MLA ka NPP na Mawhati heithaw u Comingone Ymbon uwa man u MLA ka NPP na Raliang uwa ksoh waroh chi kattu kam u Montri ka chnat Fisheries wa PWD (Building) ha ka sorkar MDA. Katwa uwi won u Montri wa da yoh u psiah thymme ha ka sorkar toh u Renikton L Tongkhar uwa man u MLA ka HSPDP na Mawkywat uwa da kylliang heithaw u Samlin Malngiang uwa man u MLA ka HSPDP na Sohiong wei uwa jooh man kam u Montri ka chnat PHE.

Advertisement ad1

Ya kini ki Montri thymme ha ka sorkar synrop MDA da pynsmai ynne i janmiet da u Lat ka jylla, u Satya Pal Malik, wei ha kani ka sngi da sakhi lang da u Montri Rangbah, u Conrad K Sangma, u Symbood Montri Rangbah, u Prestone Tynsong, u Montri kaam pohyung, u Lahkmen Rymbui, ki sahep Sorkar nadooh u Chief Secretary, u DGP wa kiwi kiwi.

I thung ya ki Montri thymme toh deiwa sñiawthooh yumut hapyrdi ki MLA, ong u Conrad

U Montri Rangbah ka jylla, u Conrad K Sangma da ong u wa nadooh wa sdang ka sorkar da mynjur ko wow e laad lang ya kiwi ki MLA wow man kam ki Montri ha ka sorkar neibhah wa toh ka sorkar synrop yong 6 tylli ki seiñ saiñ pyrthai, deiwa ong wa ini i rai toh hadien wa da ya phyllu yumut bha, wei i jied ya ki ar ngut ki Montri wa thymme ha ka sorkar Meghalaya Democratic Alliance (MDA) toh deiwa sñiawthooh yumut wa ki Montri warim, kitæ u Samlin Malngiang wa u Renikton L Tongkhar na ka HSPDP wa u Dasakhiatbha Lamare wa u Comingone Ymbon na ka NPP.

Heiyatoh wa i pyndam syndet ya u Coming na ka chuki Montri uwa da jop kam u MLA la le sien, u Conrad da ong u i yaklam wow kylliang ya ka chuki ha ka NPP wa ka HSPDP toh kawa da em chwa nadooh wa sdang u chna ya ka sorkar, deiwa ong wa ha i por wa psiah u Ymbon cha ka Party da em i yaklam wa daw yoh u yaka chuki kam u Montri ha ka sorkar, tangwa hadien wa da jop ym ye wow pynhun lut ya waroh wei da em leh i yaklam wow ya kylliang noh yaka chuki Montri.

Ha i jooh i por u Myntri Rangbah da ong u wa ynne sngi toh i kylliang ya ki ar ngut ki Montri, katwa i ya bhah thymme ya ki kaam daw em ya waroh ki Montri wei ya ini daw leh.

Ym em i pynbait chwa wow yoh ya ka chuki Montri: Dasakhiat

Hawa klam hadien wa da dep chim yei smai kam u Montri thymme, u Dasakhiatbha Lamare da pyntip u wa ym em em chwa i ya pynbait nadooh nachwa wow kylliang ya ka chuki Montri sorkar ha ka NPP nadooh wa sdang, tangwa hadien wa ya syllok da ka Party deilang wa u MLA ka Raliang da mynjur u wow e laad ya ka chuki Montri deiwa ya sñiawthooh yumut.

Da ong  u wa i jied ya oo kam u Montri hanla man u uwa khynnah tam napyrdi ki MLA ha ka sorkar, toh neidaw wa ka Ri Bhoi District ha kini ki 2 snem chiteiñ ym em Montri wa pait yaka. Ha i jooh i por da e khublei u leh ya u Montri Rangbah wa ki dkhot kiwa em ha ka sorkar MDA wei khamtam ya u Comingone Ymbon.

U booddien O ya ki kaam wa dang sahteiñ yong u Samlin: Renikton

Hawa yaklam wa u Renikton L Tongkhar da ong u wa kam u Montri na ka jooh ka Party wa u Samlin Malngiang, da kular u wow booddien wow pyndep ya ki kaam wa dang sahteiñ næ kiwa da maitphang da u Montri kiwa da cha pyndam noh. Ini i klam yong u Tongkhar toh hadien wa kylli ya i paan por yong u Samlin wow pyndep chwa ya ki kaam hapoh ka chnat hachwa wow ekti ya i kaam Montri.

Ha iwi i liang da ong u wa kam u Montri u chim u yaki laad ki luti wow kyntu ya ka South West Khasi Hills District khamtam hawa yatoh wa em boon tylli ki yung krehkaam kiwa toh u em wa i em ki boon tylli ki yung krehkaam ki wym krehkaam wei kamjooh ya ka sarokbah wa da yooluti lyngba ka chnong Mawkyrwat cha Ranikor.

Share this:
Previous

COVID-19: Da khang ya ka Gumaghat Out-Post, SWKH

Next

Da yabhah thymme ya ki kaam wa ksoh ki Montri ka MDA