Jowai: Ki damok kiwa ym pu yoh u kem, da bær bih ki wow pynyap khiar ya ki dakha kiwa sumaar wa ri kyrpang da ka Jaiñtia Fishing and Environment Protection Association JFA&EPA), Jowai ha ki bynta yong ka wah Myntdu kawa tip kam ka Mutong Khian.
U Lamwan Paswet uwa man u President yong kani ka seiñ kawa da chimkhia wow pynneh yaki dakha khamtam ha Syntu Ksiar kawa man ka Fish Sanctuary, da ong u wa mar sien yoh yutip ya ini i jia da lai sakhi u dei khmat wei da chem wa em ki dakha kiwa da yap kiwa dang pær ha sla um. Yoosar wa kiwa leh ya ini i kaam da leh ki ha i por miet yow tong yaki dakha wei hawa lai u cha kani ka thaw da yoh u wow pyllang sa du kattu katni ki dakha wa da yap.
U Paswet da ong u leh wa iwa sñiawsih toh wa ki dakha kiwa chah ktah bha na ini toh ki jait wa tip kam ki Chocolate Masheer næ ki dakha tynre kiwa man ki dakha kiwa kyrpang yong kani ka thaaiñ wa kiwa em haka thup yong ki mrad kiwa da jan dooh jait.
U Paswet da ong u leh wa neiliang ka seiñ ka da maham ko wa lada chem ya kini kiwa leh ya ini i kaam sih, daw pynchitom yaki katkam ka aiñ wei ha i jooh i por da kyrpaad u ya i ya krehlang yong ki paidbah waroh wow yarap khnang wow chem ya kiwa leh sih kiwa da lehbeiñ ya ki doh um.
Ha i jooh i por da kyntu u leh ya kiwa chong chnong yong ka chnong Jowai wa ki chnong wa markhap wow ya krehlang wa ka seiñ khnang wow ye u pynneh pynsah yaki dakha kiwa em ha ki wah wei khamtam haka Fish Sanctuary kawa em haka bynta yong ka Syntu Ksiar yong ka wah Myntdu.
Discussion about this post