U montri rangbah ka jylla u Conrad K. Sangma, ynne ka sngi da ban joor u yei emkaam wa ki thaw wym haap hapoh ka Sixth Schedule hapoh ka jylla wow lait ki naka Citizenship Amendment Act (CAA), deiwa kyntu yaka sorkar pyrdi wow chim yaki laad ki luti wow yada ya ki jaitbru wa man tre chnong ka thaaiñ Northeast wa kynthup yaka Assam.
“I da sñiawngooh i yaka sorkar India wa da pyllait yaka jylla Manipur, Nagaland wa Arunachal Pradesh wei kamjooh ya kiwa boon ka Meghalaya tangwa i dawa i wa ka Meghalaya u lait ko waroh kawi wei wow pyllait kamjooh yaka jylla Assam,” da ong u Conrad haka 15th Annual General Conference of the Council of Nokmas ha Jengjal, West Garo Hills.
Da pyntip u wa ka sorkar jylla da chim ko yaka rai (Resolution) wow pynkrehkaam yaka Inner Line Permit (ILP) hapoh ka jylla, “I yieñ skem i hei dawa yong i, wei u pteiñ i wow yaklam waka sorkar pyrdi hadooh wow lait na kani ka aiñ wei wow yoh ki bru yong i ya i yada.”
Da ong u leh wa boon na ki jylla ka thaaiñ Northeast da yoh ki ya i yada katwa ka jylla Assam dang chem chitom ko hapoh ka CAA wei ka Assam leh emkaam ko ya ki jiat yada wa ya sariem.
Hawa yaklam wa ki spah ngut ki Nokma (Village Chief), u montri rangbah da ong u wa kam ki Nokma, ki man ki kiwa ksoh wa pait wow yada ya i hok ki tre ri tre chnong.
“Ka sorkar daw chna ko ya ki Policy wa kiwi ki laad ki luti wow yada ya ka jaitbru, ka khyndaw ka chyiap tangwa ki rukom synchaar chnong yong warim wa jah toh u pteiñ ki yow ye ki u e ya i yada nadooh na tre na thied ka imlang sahlang,” da ong u Conrad.
Da kyrpaad u leh ya ki waheh chnong wym toh u dai ki ya ki thaw ki bhaw cha kiwa na baar kiwa leh katwa ye ki yow yoh thaw ki hapoh Meghalaya, deiwa klam chaphang i dai Benami. Da ong u leh wa emkaam wow booh yei thoh i taar chaphang ki Nokma, i rukom im ki jaitbru Garo yow ye ki juk wow wan u sñiawthooh yei emkaam i em ki Nokma hapoh ka imlang sahlang.
Discussion about this post