Ban joor u Wailad yei emkaam wow thung kreh da ki bru yong i hi ha ki karkhana

Ka Committee on Environment wa em hapoh ka Meghalaya Legislative Assembly hei yahkhmat u Chairperson, u Wailadmiki Shylla ynnin da lai pait ki ya ki karkhana Cement wa ki Coke Plant wa em ha East Jaiñtia Hills District yow pait kammon ktah ki ya ka bei ramaw.

Da ya emlang leh ki dkhot ka Committee kam u Mayralborn Syiem, MLA, u Sosthenes Sohtun, MLA, ka Santa Mary Shylla, MLA deilang wa kiwi de.  

Kani ka Committee da lai pait ko ya ka Jaintia Coke Pvt. Ltd wa em ha Chiehruphi, ka Dalmia Cement Bharat Limited wa em ha Thangskai waka Star Cement wa em ha Lumshnong.

Ha Star Cement, neiliang u Wailadmiki da ong u wa i kaamram ka Committee toh yow pyntikna wa ki kaam kini ki karkhana ym wanrah ko yei pynsih ya ka ramaw wei toh u pyntikna wa ka ramaw yoh ko yei yada deiwa emlang leh i yoh nong neibhah toh i kaamram yong i wow pynneh pynsah ya ka ramaw neibynta ki khon ki kti yong i kiwa daw wan.

Related posts

Ki paidbah pynbor ki ya kiwa mihkhmat wow wan cha ki yalang tangwa chah khñium won lada pynemkaam Siren: Paul

November 18, 2024

Dam noh ka NPP wow kyrchaan ya ka sorkar ka Manipur wa yahkhmat da ka BJP

November 17, 2024

Da phah u leh ya ki chnat sorkar wow pynkhreh yei pyrtuid yong waroh ki Coke Plant deilang kiwa krehkaam pyrchah aiñ lada em wei da paan u leh yow pyntip neiwon yoh ki ya ki mar wa pynemkaam ha kini ki karkhana. Chooh chooh da paan u leh ya waroh ki Quarry wa tih moochuni wa tih moo wa em ha East wa West Jaiñtia Hills.

Da paan u leh ya ka Air Quality Report neibynta ki por tlang neibhah wa ka Report wa da e cha ka Committee toh du neibynta ki bnai wa em u slap.

Da ban joor u leh yei emkaam wow em i yada nei mynsoo heipor wa kreh wei yei emkaam leh wow thung bru wakreh da ki tre chnong neibhah em leh ki khynroo yong i kiwa da pyndep yei puræ Chemical Engineering, Civil Engineering wa kiwi de, kamtæ ki tre karkhana toh u pyrkhat ki wow thung smat da ki bru yong i.

U Mayralborn Syiem won da sñiawkhia u yei long i man ka la-ær wa riñ mynsien ki bru wei da ong u wa emkaam wow pait ya ini da kiwi ki bru wa laitlooid wei da paan u leh ya ki Report na ka Meghalaya State Pollution Control Board.

U Sosthenes Sohtun da klam u yei rukom tih moochuni wei da kyntu u ya ki chnat sorkar wa toh u pait yeini yow pyntikna wa da bood yei kyndon.

Ka Santa Mary Shylla leh da ong ko wa da toh i por wow khyrngiat noh deiwa kyntu ya kini ki karkhana wow chimkhia ki ya ka ramaw wow pynneh pynsah ka deiwa thung ya ki dieñ khamtam ha ki thaw wa tih ya ki mar pohkhyndaw.