Ka yalang pynskem Unit ka NPP wa da pynman hei miet ka 22 tarik uni u bnai ha chnong Nongkhroh, WJH da man ko kawa chongchit heiwa da ki spah ngut kiwa kyrchaan warim ka Congress da psiah NPP ki.
Ha kani ka yalang da em leh u Waheh Chnong, Chairman Chnong, Secretary Chnong wa ki dkhot chnong heiwa da yoh ya ki ktien wai phang nyngkong na u Waheh Chnong uwa da pdiang sñiawbha ya ki paidbah wa chong chnong waroh wa da pynyoo ki yei yatylli kam ka chnong pyllun wow kyrchaan biang sa chisien ya u Sniawbhalang Dhar kam u kyrtong. Da e khublei u leh ya u MLA ya ki kaam pynroi wa da dep theh u cha ki hapoh ka chnong ka thaw.
“Kam ka chnong wa haap hapoh khloo dap i dei sñiaw sarong wa nadooh wa yoh ya uni u MLA da man sakhiat ko i kyrkhu ya i waroh, ha waroh ki liang,” da ong u Waheh Chnong.
Da yoh leh yei klam na uwi na kiwa yahkhmat warim ka Congress, u Tomi Marboh uwa da ong wa oo man u uwi wa pyrchah ya u Sniawbhalang ha Election 2018 tangwa yoo u ha kini ki 4 snem chiteiñ hanla boon kiwa pyrchah em hi hapoh ka chnong tangwa yoo u wa uni u MLA ym em thaw u ya kam itæ heiwa da noh u chiboon ka roi ka paar hapoh chnong poh thaw, iwa pynman ko ya oo wow pyrkhat arsien u paya uni sakhiat toh u tæ uwa mihkhmat wym em leh chiliang khmat wei man sakhiat u uwa biang wow chong hapoh Assembly. Kamtæ oo wa ki kiwa kyrchaan yong oo da rai ki wow e yei kyrchaan ya u Sniawbhalang Dhar haka Election MLA 2023.
Neiliang u Sniawbhalang Dhar dap u dei sñiawkmen hawa sñiaw u yei klam kiwa chwa ya oo kiwa da pynsñiaw ki yei kaam wa oo da dep leh u hapoh ka chnong yong ki. Ong u wa phi sakhiat man phi kitæ ki waheh wa em ya itæ i sñiawngooh hawa yoh phi iwon iwon i roi i paar.
Da ong u leh wa iwon iwon i kaam wa oo da kular u wow leh da leh u yeitæ, yei wym ye u, da klam u dei khooid wei ki paidbah wow sakhi yei kaam yong oo.
Da e khublei u leh ya kiwa kyrchaan warim ka Congress wa da bien ki u emlang chirup wa oo wei dap u dei sñiawkmen wa yoo jngai ki ya ka mynried ka chnong wa ya ka Constituency hi waroh. “Kyrpaad O ya kitu ki lok wym pu emlang chirup wa nga wow pyrkhat arsien phi yow e yei kyrchaan ya nga yow man hi ka chnong ka thaw wa phooh wa phieñ deiwa phi yatylli phi waroh wei sñiawkmen O yei sñiawngooh hawa yoh phi iwon iwon i roi i paar neibhah boonsien ki bru wa yoh myntoi na nga ha kawon kawon ka bynta kitæ wa jooh ong ym yoh ki wei kitæ kiwa jooh pyrchah manda poi Election.”
Kiwa kitkaam ka NPP Nongkhroh Unit wa da pynskem man ki kamni:
President- U Ekwin Rynjah
Vice President- U Tomi Myrboh
Secretary- U Romes Diengdoh
Assistant Secretary- Ka Lina Nongrum
Adviser- U Kyrmen Rynjah wa u Karmilo Nongrum
Da pynskem leh 29 ngut ki Executive Member wa kynthup ya ki chynrang wa kynthai.
