Jowai: Ka chnong Trangblang ha ka khubor wa da phah yow pynche yeiwa jia ha ka 6 tarik uni u bnai hapoh ka chnong da ong ko man ki kiwa khyrngiat wa dap ki dei sñiawkhia wa khroo hadooh kattæ kattæ ya i chah tynyap yong u Thomlin Surong, waheh chnong ka Amlanai, u Hamboy Langshiang Secretary chnong ka Amlanai wa u Shanbor Khongiong u dkhot chnong ka Amlanai wa kamjooh leh ya kiwi ki le ngut kiwa da mynsoo joor kiwa em hapyrdi i chah sumaar hapoh Hospital.
Neiliang ka dorbar chnong Trangblang da beiñ joor ko ya kitu kiwa emkti kamwa da mih ha ki kot khubor kiwa da chim ya ka aiñ pyn ha ki kat hadooh wow poi cha u pood wow pynkut yabor ya i mynsien yong ki le ngut.
Ka chnong Trangblang da pynche ko heini wa kiwa chong chnong ka Amlanai wa kamjooh leh ya kiwi ki chnong wa ka chnong Trangblang ym embynta ki iyi iyi leh ha ini i jia ha iwon iwon i liang leh neibhah ya ini i jia da leh da ki kattu katni ngut ki bru kiwa toh kiwa chong chnong ka Trangblang na ki daw samen yong ki ha kawa ka chnong ym tip ko iyi iyi leh. Chooh chooh ka chnong Trangblang da pynche ki ya kiwa chong chnong ka Amlanai wa ymtoh u tieñ næ artatien ki wow lai wow wan hat lyngba ka chnong Trangblang.
Ka chnong Trangblang da dep phah ko ya ka khubor sñiawlem cha kiwa hayung hasem yong kitu kiwa chem ya ini i jia wa sñiawsih wei da kitbok kit rwiang leh ya ki le ngut kiwa dang em ha ki thaw sumaar wow yoh ki smat ya i chait i khiah.
Discussion about this post