15 49.0138 8.38624 1 0 4000 1 https://wyrta.com 300 0

Beiñ joor ka HYC ya ka seiñ kiwa dai madan yei lai tur thlah ki cha ka KHADC

0 Comments

Jowai: Ka HYC Shillong City da beiñ joor ko ya ka seiñ kiwa chong dai madan kawa tip kam ka Meghalaya Greater Shillong Progressive Hawkers & Street Vendors Association (MGSPH & SVA) kawa da lai tur thlah, khlem sñiawthooh ynnin ka 4 tarik cha KHADC, du neibynta i yoh nong samen yong kiwon næ kiwon.

Katkam wa tip ka seiñ, kine ki bru hi, ki sdang dooh thiah dooh dem ki nadooh wa ka KHADC lyngba ka chnat Trade ka da khyndang ko ya ki baar jylla kiwa khayi khlem License ha ki thaaiñ GS Road.

Advertisement ad1

Ha i yoo yong ka seiñ, ini i leh ka KHADC da wai laad ko ya kiwa dai madan kiwa man ki tre chnong wei khanglaad ko ya kitu ki baar jylla ki wym jooh yaleh Trading Licence næ ki wym jooh tipmit yaka KHADC da ki phaw snem.

Ka seiñ kwah ko wow pynche ha kitu kiwa chong dukan kiwa ya lai lang ynnin wa katkam ka Point No. 4 yong i dawa katai ka Association man ko wow dawa e Trading License cha kiwa ym toh ki tre chnong. Kamtæ ka seiñ da kylli ko na kiwa chong yaw wa lada ki man ki ki para doh para snam, wei hadooh katwon sniaw biang wow pynman ya ki wow lai kyrpaad e Trading Licence cha u baar jylla? Lada chah yahbkla ki, ka seiñ ong ko wa dang em i por ya ki wow kylla thiah kylla dem, tangwa lada man ko ka mon yong ki hi, wa toh u tip ya i parom wa ong wa kiwa ri psein manda yoh u yeiwa kwah u daw pooh kylla u ki iwa ye u jia ya ki.

Hawa yatoh won wa i e Form ka KHADC wow thooh yutip ya kiwa man kiwa khayi kiwa ki Khasi, ka seiñ sñiaw ko wa man ko kawa biang, neidaw wa daw yarap ko ya kiwa chong dai madan kiwa man ki Khasi wow pynskem ya i yoh khayi yong ki khnang yow ye ki u pyndap ya iwa emkaam ha yung, u lait ki leh na i chah knieh thaw ha ki dkhar wei wow pyndooh jait yaka Benami.

Ka seiñ da yaroh wei da e mynsien ko ya ki pulit Enforcement yong ka KHADC khamtam ya u EM i/c Trade wa ya u CEM wa da ye ki wow chim ya kani ka kamram, kawa i kam ka jaitbru da yooluti i da slem bha.

Da kyntu leh yaka KHADC wa ym toh u pyndem ha kini ki khwan myntoi, kiwa thmu wow baam dooh ya ka jaitbru yong i du wow myntoi samen yong ki.

Ka kyrwoh na u John Lyngdoh, President ka HYC Shillong City.

0 Comments

Leave a Reply