Khliehriat: Ka seiñ Jaintia Youth Federation-Bataw Unit ha ka kyrwoh khubor wa pyllait lyngba u J. Lakhi u President ka seiñ da ong u wa neiliang ka seiñ sñiawkhia ko yei lehke ki wakreh yong ka Bataw PHC ya ka manbei kawa tip kam ka F. Thamar na ka chnong Lakadong Ummat kawa thmu wow wan kha khon ha ka PHC ha ka 29-08-2020 hei por 10:15 i miet heiwa ym em wa yarap ya ka hadooh wa hap ko u liwan cha yung ka Beiñia ko ha Bataw wow pynkha lyngba i yarap kawi ka manbei na chnong Bataw hawa lyngba i emlang u Blai da yoh ko u kha suk kha saiñ.
Chooh chooh ka seiñ da ong ko wa da yoh yutip na kiwa chong chnong heiwa da em kamni hi i jia ha ka 30-07-2020 heipor 4 waje i step heiwa da jia kamni i jooh heiwa kawi ka manbei leh kawa thmu wow lai kha khon ha katai ka PHC wei da chem wa ym em wakreh (Doctor/Nurse) ha katai ka Bataw PHC hadooh wa hap ki u lai booh ka cha ka Khliehriat CHC.
Hajrong kini ki yurim, ka seiñ da beiñ joor ko ya ki wakreh katai ka PHC deiwa dawa ko na ka sorkar lyngba ka chnat i chait i khiah wow pynchitom ya ki.
U J. Lakhi da ong u lada ki wakreh ym kwah ki u kreh ha kani ka PHC wow sñiawbha ki u dam noh neibhah dang boon kiwa kwah u kreh khamtam ha kini ki por wa dooh kreh.
Neitæ da yoh ujor leh na ki paidbah heiwa ki dawai dachin leh dang duna bha ha kani ka PHC neibhah na i por cha i por ki paidbah ood naam ki yei duna dawai kani ka PHC.