Beiñ joor u Shangpliang ya ka sorkar wa duna yarap poisa ya kiwa yalehke hadooh cha ki Sports Association

Shillong: U MLA ka Congress na Mawsynram, u Himalaya M Shangpliang da khyrwait u ya u montri ka kaam yalehke ka jylla, u Banteidor Lyngdoh uwa ym ye u jubab ya iwa chah kylli u, iwa yatoh wa i pynlut heiyatoh wa ki Stadium, uwa da pyntip wa ka yutip wa da yoh wa ka sorkar da pynlut ko hadooh palat T.10 klur du wow chna ya ki Stadium katwa du T.43 lak wow pynlut neibynta kiwa yalehke ka jylla waroh kawi.

U Shangpliang da pynsñiaw u yei sñiawkhia leh wa ka chnat yalehke da e yarap ko du T.15 hajar cha ka dhab Taekwando kawa lai ya chimbynta ha ka 5^th Grand Title Championship wa du T.60 hajar ya ka Meghalaya State Badminton Association kawa lai chimbynta ha ka North East Zone Inter State Badminton.

U MLA ka liang pyrchah da beiñ joor u leh yaka sorkar wa ym ye ko wow e yarap cha kiwa boon kiwa yalehke kiwa mihkhmat ya ka jylla kawa da pynman ya ki wow dooh yaka laad wow lai ya chimbynta ha ki lympung cha baar ka jylla.

Hawa yarap wow jubab ya iwa kylli, u montri rangbah, u Conrad K Sangma da ong u wa kani ka sorkar wa katni da e yarap ko ya kiwa boon ki dhab yalehke hawa nujor wa kiwi won ki snem. Da pyntip u wa ha u 2015-16 ka yarap na ka sorkar da poi ko du T.29 lak wei ha u snem 2016-17 leh du T.29 lak, katwa ha u snem 2017-18 ka sorkar ka sorkar ym em e yarap ko iyi iyi leh, tangwa hadien wa wan ka sorkar wa thymme, ha u snem 2018-19 da e yarap cha ki dhab yalehke da ku ko cha ka T.49 lak.

Related posts

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

November 14, 2024

U Conrad da ong u wa kani ka rukom e yarap cha ki seiñ næ Association kiwa yalehke da lai ko nadooh ki snem kiwa nachwa, tangwa ha uni u snem ka chnat ka em ko i thmu wow pynku chooh chooh yaka yarap poisa wa ha ki snem wow wan leh.

Heiyatoh won wa i e yarap poisa cha ka Meghalaya State Olympic Association (MSOA), da ong u wa ka MSOA da paan yarap ko na ka sorkar hadooh T.41 klur neibynta wow pynkhreh ya kiwa yalehke wow chimbynta ha ka National Games 2022, tangwa ka sorkar ka dang bichaar bniah ko ya ini neidaw wa ka poisa wa paan da boon ko.  

Chwa ya ini hawa jubab ya iwa kylli wa da wanrah da u Shangpliang, u montri ka kaam yalehke da ong u wa ha u snem 2018-19 ka chnat ka da pyllait poisa ko T.49 lak wow yarap ya ki 36 tylli ki Sports Association kiwa ya chimbynta næ kiwa pynman ya ki lympung yalehke.

U Banteidor da pyntip u leh wa ha u snem 2019-20 ka chnat da pyllait poisa ko palat T.34 lak na ka bynta wow yarap poisa cha ki 64 tylli ki seiñ yong kiwa yalehke.